Shkruan: Mustafë Bajrami
Mbi 18 milion banorë të Turqisë dhe Sirisë sot janë goditur nga një tërmet i fuqishëm ndër më të fortët që ka ndodhur ndonjëherë.
Tërmeti është ndier në shumë shtete. Megjithëqë epiqendra e tij ishte në Turqinë jugore, ai u ndi prej Gjeorgjisë në kufi me Rusinë e deri në Egjipt. Gjithsesi tërmeti ka tërhequr vëmendjen e sizmologëve dhe gjeologëve të njohur në mbarë botën. Ata e konsideruan atë një nga tërmetet më të fortë ne histori dhe paralajmëruan për pasoja të mundshme.
Tërmeti ishte me magnitudë 7.8 të shkallës Rihter dhe 11 minuta më vonë pasoi një goditje tjeter me magnitudë 7.6 ballë, e cila shkaktoi shkatërrime masive dhe la mijëra të vdekur e të plagosur.
Ky tërmet u cilësua si më i madhi në histori dhe afër tij për nga fuqia është vetëm tërmeti i Erzincanit që ndodhi në verilindje të Turqisë në vitin 1939 me 39 mijë viktima dhe 140 mijë të lënduar.
Sizmologu Stephen Hicks në një postim në Twitter ka shkruar: “Duket qartë se ky tërmet do të regjistrohet si një nga tërmetet më të mëdhenj që ka ndodhur në një zonë banimi në historinë e njerëzimit.
Shqetësime të mëdha në Itali
dhe në vende tjera përreth Mediteranit!
Departamenti Italian i Mbrojtjes Civile sot ka lëshuar një deklaratë për mundësinë e pasojave katastrofike të tërmetit në brigjet italiane, i cili mund të shkaktojë një cunami, dhe u rekomandoi qytetarëve që të qëndrojnë larg zonave bregdetare dhe të ndiqnin udhëzimet gjatë koha aktuale. Ky rekomandim i drejtohet edhe qytetarëve shtetasëve të vendeve që kufizohen me Detin Mesdhe.
Sizmologia Susan Hoff në tweet-in e saj tregoi se krijimi i një modeli të plotë që do të tregonte se çfarë ndodhi me këtë përhapje kaq të madhe të dridhjeve mund të marrë kohë, pasi duhen fotografi nga sateliti për të treguar se si lëvizi toka.
Paralajmërime të mëparshme!
Nëse ky tërmet ka befasuar miliona njerëz nëpër botë, kjo nuk ka ndodhur edhe me ekspertë të gjeologjisë dhe tërmeteve. Ditët e fundit shumë prej tyre kishin paralajmëruar për mundësinë e një tërmeti tragjik në rajon. Ndër to është edhe paralajmërimi i Qendrës SSGEOS, e specializuar në parashikimin e tërmeteve kur me 30 janar foli për një aktivitet të fortë sizmik atje.
Tërmeti i sotshëm erdhi në kohën kur Turqia po përjeton një stuhi të fortë bore. Disa e lidhën këtë me tërmetin, megjithëqë sipas sizmologëve, kjo nuk është e mundur.
