Presidenti i Shteteve të Bashkuara, Donald Trump, ka deklaruar se po has më shumë vështirësi në negociatat me Ukrainën sesa me Rusinë për të arritur një paqe mes dy vendeve.
Ai theksoi se SHBA-ja po ecën “shumë mirë” me Rusinë dhe se ndoshta do të jetë më e lehtë të bashkëpunojë me Moskën sesa me Kievin.
Trump ka pezulluar ndihmën ushtarake dhe ndarjen e inteligjencës me Ukrainën, duke ngjallur shqetësim mes aleatëve të NATO-s. Vendimi i tij erdhi pasi ai kritikoi publikisht presidentin ukrainas, Volodymyr Zelensky, duke e akuzuar atë për “mosrespekt” ndaj Shteteve të Bashkuara. Kjo lëvizje u pasua nga një sulm i madh me raketa dhe drone nga Rusia kundër infrastrukturës energjetike të Ukrainës.
Gjithashtu, administrata amerikane ka pezulluar përkohësisht aksesin e Ukrainës në disa imazhe satelitore të ofruara nga kompania Maxar. Këto imazhe janë të rëndësishme për mbledhjen e inteligjencës dhe planifikimin strategjik të ushtrisë ukrainase.
Ndërkohë, Trump ka shprehur shqetësim për sulmet e fundit ruse, duke paralajmëruar mundësinë e vendosjes së sanksioneve dhe tarifave të reja ndaj Rusisë. Ai ka deklaruar se Vladimir Putin “po e godet Ukrainën më fort se më parë”, por gjithashtu ka theksuar se nuk është i sigurt nëse Kievi është i gatshëm për të negociuar për paqe., shkruan A2CNN.Pavarësisht tensioneve mes dy liderëve, Zelensky ka shprehur shpresë për bisedime “të frytshme” dhe ka deklaruar se Ukraina është e gatshme për paqe “sa më shpejt të jetë e mundur”. Zyrtarë amerikanë do të udhëtojnë në Arabinë Saudite për të vazhduar negociatat me përfaqësuesit ukrainas
