Policia ka gjetur dy armë në një apartament në Tiranë, ngjitur me një tjetër banesë, ku kishte shkuar pas telefonatës për ndihmë të marrë nga një vajzë.
Pasi policia shkoi në vendngjarje duke iu përgjigjur thirrjes, hasi në kundërshtimin e vajzës për të hapur derën, çka bëri të dyshohej se ishte një rast pengmarrjeje.
Në vendngjarje ishte edhe babai dhe daja i saj, të cilët po negocionin me vajzën bashkë me negociatorin e RENEA-s, për të hapur derën. Sipas të atit, vajza është rrëmbyer dhe ajo vuan nga depresioni. Pas disa përpjekjesh, një efektiv arriti të futej në banesë nga ballkoni, ndërsa mësohet se e reja është qetësuar.
Sipas burimeve të A2 CNN, armët po këqyren nga ekspertët e kriminalistikës. Apartamenti ku u gjetën armët dhe ai ku qëndronte vajza mësohet se ishin marrë me qira nga i dashuri i saj. Sipas informacioneve që policia ka arritur të sigurojë deri në këto momente, në banesë kanë qenë disa djem, të cilët mendohet se janë larguar para se vajza të mbyllte derën.
