Ka vdekur në Qendrën Klinike Universitare të Kosovës (QKUK), njëri nga dy të plagosurit që u qëlluan me armë zjarri katër ditë më parë në Rahovec.
52-vjeçari u plagos me armë zjarri më datë 19 të muajit shtator në rrugën “Fahri Fazliu”.
Lajmin për teve1.info e ka bërë të ditur zëdhënësi i Policisë së Kosovës për rajonin e Gjakovës, Sheremet Elezaj.
“Dje rreth orës 21:40 jemi njoftuar se viktima, mashkull i lindur në vitin 1971, ka ndërruar jetë në QKUK. I ndjeri me datën 19.09.2023 ishte qëlluar me armë zjarri në rrugën “Fahri Fazliu” në Rahovec”, tha Elezaj.
Ndërsa, i plagosuri sipas Organizatës së Veteranëve të Luftës së UÇK-së në Komunën e Rahovecit, është vëllai i të ndjerit, e ku i njëjti vazhdon të marrë tretman mjekësor.
Lidhur me këtë rast, në ditën e ngjarjes Policia e Kosovës ka njoftuar se dy persona janë dorëzuar, ku të njëjtit dyshohet se janë të përfshirë në ngjarje.
“Lidhur me rastin është organizuar operacion bastisje ku janë konfiskuar gjashtë armë të ndryshme dhe municion. Aktualisht hetuesit policor, në koordinim me prokurorin e shtetit janë duke punuar për të ndriçuar dhe sqaruar të gjitha rrethanat që kanë të bëjnë me këtë rast”, ka njoftuar Elezaj.
