Shefi i stafit të Presidencës, Blerim Vela, i ka reaguar Petar Petkoviqit, drejtorit të ashtuquajturës Zyrë për Kosovën në Qeverinë e Serbisë, i cili deklaroi se Qeveria e Serbisë është kompetente për marrjen e vendimeve politike edhe në territorin e Kosovës.
Petkoviq dhe liderët tjerë nga Beogradi po kundërshtojnë mbajtjen e zgjedhjeve më 23 prill në veri.
“Ndoshta zoti Vela dhe kolegët e tij nuk e njohin të drejtën ndërkombëtare dhe nuk janë të vetëdijshëm për faktin se Rezoluta 1244 e Këshillit të Sigurimit të OKB-së e njeh Kosovën dhe Metohinë si pjesë të Serbisë, ose nuk e kuptojnë se kjo rezolutë mbështetet në të njëjtat parime si argumentet e përdorura në Prishtinë sot për të mbrojtur integritetin territorial të Ukrainës”, thekson ai.
Vela i është përgjigjur Petkoviqit duke thënë se ai po gënjen, pasi që nga qershori i 1999 Serbia nuk mund të marrë vendime për Kosovën.
“Lista Serbe merrte pjesë në zgjedhjet e organizuara në bazë të ligjeve të Kosovës. Ju mund të pendoheni që e detyruat atë të japë dorëheqjen në nëntor dhe tani po përpiqeni t’i prishni zgjedhjet në Kosovë përmes ndërhyrjes”, shkroi Vela.
Tutje ka shtuar se kryetarët dhe kuvendet komunale në veri mund të zgjidhen vetëm përmes ligjeve të Kosovës.
“Çdo gjë tjetër që bëni është në kundërshtim me kapitullin 35 dhe marrëveshjet e Brukselit”, ka shkruar Vela.
“Fakti i së drejtës ndërkombëtare: kur vizitoni Kosovën, gjithmonë dërgoni kërkesa në institucionet e Kosovës. Pse e bëni këtë nëse Serbia ka autoritet të plotë mbi Kosovën?”, ka pyetur Vela.
