Ministri i Jashtëm i Serbisë, Ivica Daçiq, duke folur për vendimin e Komisionit Politik të Asamblesë Parlamentare të Këshillit të Evropës për rekomandimin për pranimin e Anëtarësimit të Kosovës në Këshillin e Evropës thotë se nuk është dashur të jetë kaq urgjente, transmeton Kosova Post.
“Nuk mund ta zgjidhësh çështjen e statusit të Kosovës në një mënyrë, e pastaj të zgjidhësh çështjen e Ukrainës në një mënyrë tjetër. Ky vendim paraqet shkelje të drejtpërdrejtë të interesave tona kombëtare dhe shtetërore, shkelje të integritetit tonë territorial”, tha Daçiq në Nova Jutru TV Pink.
Daçiq tha se ky vendim është në kundërshtim me të gjitha parimet mbi të cilat mbështetet Këshilli i Evropës.
“Epo, ky është realiteti politik në të cilin jetojmë”, tha Daçiq dhe shtoi se vendimi përfundimtar pritet në maj.
Për tema të tilla nevojiten dy të tretat ose gjysma e atyre që votuan, ata që votuan numërohen, ata që nuk votuan ose abstenuan nuk numërohen, shpjegoi Daçiq.
