Vlerat e manganit në ujë vazhdojnë të jenë mbi vlerat e lejuara. Sipas Institutit Kombëtar të Shëndetësisë Publike, mangani nga uji që vjen nga Liqeni i Badocit nuk largohet as me vlim dhe se aktualisht është papijshëm.
Por, sa po përdoret uji nga ky liqe për pije e gastronomi?
RTK ka qëndruar në disa lokale për të parë nga afër nëse po respektohet thirrja e Institutit Publik të Shëndetësisë.
Në shumë prej lokaleve në zonat nga ku furnizohen nga Liqeni i Badocit, uji nuk po shërbehet për pije, kurse thonë se atë nuk po e përdorin as për përgatitje të ushqimit.
Vlerat e manganit në Liqenin e Badocit dhe mungesa e inspektimeve në gastronomi kanë qenë pikërisht shkak i përplasjes së deputetëve të pozitës dhe opozitës në Komisionin për Mjedis.
“Helmimi i ujit të Badocit me mangan, duhet të sensibilizohen qytetarët. Mendoj që njoftimet janë të pa mjaftueshme.Nuk mjafton një cisternë me iu dërguar ujë qytetarëve. Të inspektohen restorantet, kafiteritë që shërbehen me ujin e Badocit ne ushqim dhe pije. Jemi duke e dërgu qytetarin drejtë një katastrofë të përgjithshme”, ka thënë Ganimete Musliu, deputete nga PDK.
“Ne si Komision nuk na takon që ta marrim përsipër cilësinë e ujit, IKSHPK i njofton qytetarët. Na mundemi me bë thirrje por nuk jemi kompetentë me bë matje të përditshme. Qytetarët duhet ta kenë adresë IKShPK, e jo neve, na mundemi me nda thirrjen e Institutit”, tha në anën tjetër kryetarja e komisionit, Fitore Pacolli, e cila vjen nga rradhët e VV-së.
Mbledhja e Komisionit u mbyll nga kryetarja Fitore Pacolli, pas insistimit të deputetes së PDK-së për çështjen e manganit.
RTK ka pyetur edhe në Inspektoratin Sanitar të Shëndetësisë lidhur me inspektimet në gastronomi, por deri në publikimin e këtij lajmi, nuk kanë kthyer përgjigje.
