Presidentja e Komisionit Evropian, Ursula von der Leyen, tha se vendet në mbarë botën janë të gatshme të bashkëpunojnë me partnerë të besueshëm tregtarë në Evropë, pasi tarifat e presidentit amerikan Donald Trump shkaktuan përçarje në tregjet globale.
“Në një mjedis global gjithnjë e më të paparashikueshëm, vendet në mbarë botën janë rreshtuar për të punuar me ne”, tha Von der Leyen për Politico, pa përmendur Trump apo SHBA.
Javët e fundit, ajo ka folur me liderët e Islandës, Zelandës së Re, Malajzisë, Filipineve, Kanadasë, Indisë dhe Emirateve të Bashkuara Arabe, të cilët janë në kërkim të “partnerëve të fortë dhe të besueshëm”.
Sipas saj, rendi global po ndryshon në mënyrën më serioze që nga fundi i Luftës së Ftohtë. Trump njoftoi tarifat reciproke më 2 prill, duke vendosur tarifa prej 20 për qind ndaj BE-së, ndërsa ato për pothuajse të gjithë pjesën tjetër të botës janë 10 për qind. Pas një rënie të konsiderueshme në tregjet financiare një javë më vonë, ai pezulloi tarifat më të larta për 90 ditë për t’i hapur rrugën negociatave të marrëveshjes tregtare, sipas Politico
Vendet e BE-së vazhdojnë të paguajnë tarifa prej 10 për qind, si dhe 25 për qind për eksportet e çelikut, aluminit dhe makinave, ndërsa SHBA dhe Kina kanë vendosur tarifa treshifrore ndaj njëra-tjetrës.
Nëse Trump do të rivendoste tarifat reciproke, vëllimi i tregtisë globale mund të bjerë me 1.5 për qind këtë vit, me Amerikën e Veriut që do të goditet më rëndë, parashikon Organizata Botërore e Tregtisë (OBT).
Von der Layen theksoi besueshmërinë e Evropës si një kontrast me destabilitetin. Ajo shtoi se, në mes të trazirave të tilla, besimi në BE po rritet, përfshirë midis qytetarëve të saj, duke treguar një studim të Eurobarometrit që tregon se 74 përqind mbështesin anëtarësimin në BE, niveli më i lartë në 40 vjet, shkruan gazeta express.“Kjo thotë shumë. Në mes të kaosit, Evropa është e qëndrueshme, me vlera themelore, e gatshme të formësojë atë që do të vijë më pas”, theksoi Von der Leyen.
