I ftohti polar ka ngrirë gjysmën e Shteteve të Bashkuara. Më shumë se 60 milionë amerikanë në mbi 30 shtete po vuajnë pasojat e një stuhie të madhe dimërore të quajtur Blair.
Meteorologët paralajmërojnë se mund të sjellë reshjet më të mëdha të dëborës dhe temperaturat më të ftohta në më shumë se një dekadë. Një vorbull polare ka sjellë mot të ftohtë nga Arktiku në SHBA-në qendrore, me kushte ekstreme të motit që e shoqërojnë atë.
Mijëra fluturime janë vonuar ose anuluar, shumë rrugë janë bllokuar dhe shkolla janë mbyllur si pasojë e stuhisë. Vorbulla polare pritet të sjellë reshje dëborë në Kansas dhe Misuri, ku është shpallur gjendja e jashtëzakonshme.
Aktualisht niveli i dëborës është mbi 30 centimetra. Gjendje e jashtëzakonshme është shpallur edhe në shtetet e Kentakit, Virxhinias, Virxhinias Perëndimore, Arkansasit dhe pjesëve të Nju Xhersit.
Këto stuhi dimërore mund të dëmtojnë rëndë ekonominë amerikane. Moti ekstrem mund të dëmtojë infrastrukturën fizike si rrugët, ndërtesat dhe automjetet. Përtej kësaj, stuhitë e dimrit ndërpresin edhe aktivitetin normal të biznesit.
Ndërprerjet e energjisë elektrike, mbylljet e rrugëve dhe ndërprerjet e udhëtimit nënkuptojnë se bizneset duhet të mbyllen, të pezullojnë shërbimet ose të operojnë me staf të reduktuar, shkruan A2CNN. E gjithë kjo mund të çojë në humbje të mëdha siç shihet me stuhitë e fundit. Një valë e fortë e ftohtë në shumë pjesë të SHBA-së në janar të 2024-ës i kushtoi ekonomisë 3.6 miliardë dollarë sipas vlerësimeve zyrtare.
