Presidenti i Serbisë, Aleksandar Vuçiq, tha se ka pasur një bisedë “të mirë” dhe “përmbajtësore” sot me presidentin rus, Vladimir Putin, për bashkëpunimin ndërshtetëror. Ai shtoi se tema kryesore ka qenë arritja e një marrëveshjeje të re për gazin me Rusinë dhe çështja e sanksioneve të SHBA-së ndaj Industrisë së Naftës së Serbisë (NIS).
Në një deklaratë në platformën Instagram, Vuçiç ka theksuar se një marrëveshje e re për gazin duhet të lidhet para 31 majit dhe se çështja e industrisë serbe të naftës, e cila kërcënohet nga sanksionet amerikane, duhet të zgjidhet. Ai e quajti këtë çështje “jashtëzakonisht të rëndësishme për Serbinë”, raporton Beta.
Vuçiç shtoi se Putin “e kupton mirë situatën në rajon, i sheh përpjekjet dhe lëvizjet e Përfaqësuesit të Lartë në Bosnje dhe Hercegovinë dhe i kupton ato vetëm me një qëllim, që është të rrëzojë Milorad Dodik”.
Solidaritet për presidentin e Republikës Serbe, Milorad Dodik, u shpreh edhe Vuçiç, raporton Kurir.
Vuçiç bëri të ditur se do të takohet personalisht me Putinin më 9 maj, në Sheshin e Kuq në Moskë, gjatë një ceremonie për shënimin e 80-vjetorit të fitores mbi fashizmin.
Ai gjithashtu njoftoi se ka biseduar me Putinin për rimëkëmbjen e tregtisë dhe përmirësimin e bashkëpunimit ekonomik.
