Presidenti ukrainas Volodymyr Zelenskyy tha të dielën vonë se vendi i tij është gati të nënshkruajë një marrëveshje për mineralet me Shtetet e Bashkuara të Amerikës (SHBA).
“Politika jonë është të vazhdojmë, pavarësisht nga ajo që ka ndodhur në të kaluarën. Ne jemi konstruktivë. Nëse pranonim të nënshkruanim, ne ishim gati të nënshkruanim. Dhe sinqerisht, unë besoj se edhe ShBA-ja është gati”, tha ai.
Më herët, Sekretari i Thesarit i SHBA-së, Scott Bessent, tha për CBS News se një marrëveshje për mineralet midis ShBA-së dhe Ukrainës nuk mund të nënshkruhet “pa një traktat paqeje” me Rusinë.
I pyetur për të ardhmen e marrëveshjes, pasi Shtëpia e Bardhë sinjalizon nevojën për kompromis, Zelensky u tha gazetarëve në aeroportin Stansted të Londrës se marrëveshja për mineralet është gati për nënshkrim nga ministri përkatës.
Ai u pyet gjithashtu për komentet e presidentit francez Emmanuel Macron për një armëpushim të mundshëm njëmujor midis Rusisë dhe Ukrainës.
Sipas gazetës franceze Le Figaro, Macron tha se ai dhe kryeministri britanik Keir Starmer kishin propozuar një ndërprerje të përkohshme të armiqësive “në ajër dhe në det”.
I pyetur nëse ai ishte në dijeni të planit, Zelensky u përgjigj: “Unë jam i vetëdijshëm për gjithçka”.
Sa i përket faktit nëse ai është i gatshëm të diskutojë koncesionet territoriale apo t’i shprehë keqardhje Presidentit të ShBA-së Donald Trump pas debatit të tyre të ashpër në Shtëpinë e Bardhë javën e kaluar, ai nuk e trajtoi drejtpërdrejt këtë çështje.
Në vend të kësaj, ai vuri në dukje “Unë thjesht dua që qëndrimi ukrainas të dëgjohet”, duke thënë se ai nuk donte ndonjë paqartësi.
Ai shtoi se mirëkuptimi i ndërsjellë është kyç, duke theksuar se “vijat e kuqe” nuk udhëhiqen nga emocionet, por janë thjesht një realitet që duhet pranuar.
Zelensky gjithashtu ndau pikëpamjet e tij për takimin me liderët botërorë në Londër, duke shprehur mirënjohjen për mbështetjen e fortë që Ukraina vazhdon të marrë.
“Ne ndiejmë mbështetje të fortë për Ukrainën, popullin tonë: ushtarët dhe civilët, pavarësinë tonë”, shkroi ai në X.
Presindenti ukrainas gjithashtu theksoi se uniteti evropian është në një nivel të lartë në një mënyrë që nuk është parë për një kohë të gjatë.
Sipas tij, Ukraina po diskuton garancitë e sigurisë dhe një kornizë për një paqe të drejtë me partnerët e saj dhe se së shpejti janë planifikuar disa takime dhe vendime kyç.
Gjatë një takimi të mëparshëm me gazetarët, Zelensky u pyet nëse Ukraina do ta pranonte linjën aktuale të kontaktit si kufirin e saj de facto të ri.
Ai theksoi se fokusi i bisedimeve në Londër të dielën ishte në hapat fillestarë dhe se nuk do të zbulojë detaje derisa të zyrtarizohen marrëveshjet.
Ai e bëri të qartë se Ukraina nuk do të njihte kurrë territoret e pushtuara nga Rusia si pjesë e Rusisë.
Zelensky shprehu optimizëm se garancitë e sigurisë do ta bëjnë agresionin e mëtejshëm rus “100 për qind të pamundur”, por përsëriti se detajet do të diskutohen vetëm pasi partnerët ukrainas të nënshkruajnë marrëveshje.
I pyetur në lidhje me samitin e Londrës për Ukrainën dhe qëllimet për garancitë e sigurisë, Zelensky tha se garancia më e fortë e sigurisë e vendit është një “ushtri e fortë ukrainase”, një pikëpamje që ai beson se ndan Starmer.
Ai theksoi rëndësinë që aleatët evropianë të ruajnë qëndrimin e tyre ndaj Rusisë si agresore dhe përsëriti thirrjen e tij që fondet e ngrira ruse të përdoren për rindërtimin e Ukrainës.
Ai konfirmoi gjithashtu se marrëdhëniet midis Kievit dhe Uashingtonit do të vazhdojnë, por vuri në dukje se përplasja në Zyrën Ovale të premten nuk i solli ndonjë vlerë pozitive apo të shtuar partneritetit.
Pavarësisht kësaj, Zelensky shprehu besimin se situata do të kalojë dhe se bisedimet e ardhshme konstruktive do të japin rezultate pozitive.
Në përgjigje të thirrjeve nga disa politikanë amerikanë që ai të jepte dorëheqjen, Zelensky theksoi se ai do të konsideronte dorëheqjen vetëm nëse dorëheqja e tij siguronte anëtarësimin e Ukrainës në NATO.
“Unë jam i zëvendësueshëm për NATO-n. NATO do të thotë se kam përmbushur misionin tim,” vuri në dukje ai.
Megjithatë, ai shtoi se “nuk do të jetë e lehtë të më ndryshosh, sepse nuk mjafton vetëm mbajtja e zgjedhjeve. Duhet të më pengosh të marr pjesë. Dhe do të jetë pak më e vështirë”.
Gjatë vizitës së tij në Uashington, Zelensky hyri në një debat të ashpër me Trump dhe zëvendëspresidentin e SHBA JD Vance, të cilët e akuzuan vazhdimisht se ishte mosmirënjohës për mbështetjen e amerikanëve për Ukrainën.
Një luftë fjalësh shumë jodiplomatike zgjati rreth dhjetë minuta në Shtëpinë e Bardhë, ndërsa Zelensky u përpoq t’i mbronte veprimet e tij në konfliktin më shumë se tre-vjeçar me Rusinë, shkruan trt golal. Zelensky më pas u largua nga Shtëpia e Bardhë dhe ceremonia e planifikuar e nënshkrimit për marrëveshjen kryesore të mineraleve dhe konferenca e përbashkët për shtyp u anuluan.
