Zëvendësministrja e Punëve të Jashtme dhe Diasporës, Liza Gashi, e shoqëruar nga Komisioneri i Republikës së Kosovës në Japoni, z.Arber Mehmeti, është pritur në një takim nga zv. sekretari i përgjithshëm i Sekretariatit japonez për ekspozitën botërore “EXPO 2025”, Manatsu Ichinoki, i shoqëruar nga drejtori ekzekutiv, Yoichi Miyagawa, njëherësh zyrtar përgjegjës për Republikën e Kosovës, që do të jetë pjesë e ekspozitës në Osaka, “EXPO 2025”.
Derisa u diskutua për përgatitjet e Republikës së Kosovës si pjesëmarrëse në këtë ngjarje tejet të rëndësishme me karakter ndërkombëtar, zëvendësministrja Gashi e njoftoi sekretarin Ichinoki për planin dhe për hapat konkretë që po i ndërmerr vendi ynë në kuadër të këtyre përgatitjeve.
Zëvendësministrja Gashi theksoi rëndësinë e pjesëmarrjes së Kosovës në këtë ekspozitë, si një mundësi për të promovuar potencialin e vendit në arenën ndërkombëtare, si dhe për t’i forcuar më tej marrëdhëniet e saj me partnerët ndërkombëtarë, si në aspektin ekonomik, po ashtu edhe në atë kulturor. “EXPO 2025 është një mundësi unike për imazhin e Kosovës, si një vend me potencial të lartë për zhvillim dhe bashkëpunim ndërkombëtar, por edhe për të forcuar më tejë bashkëpunimin dypalësh me Japonin, tha zëvendësministrja Gashi.
Nga ana tjetër, zv. sekretari i përgjithshëm, Manatsu Ichinoki, e falënderoi zëvendësministren Gashi për vizitën dhe shkëmbimin e informatave lidhur me përgatitjet e Republikës së Kosovës për ekspozitën “EXPO 2025”, duke e vlerësuar këtë pjesëmarrje shumë të rëndësishme në promovimin e potencialit ekonomik, kulturor, turistik dhe inovativ.
