Dhoma e Përfaqësuesve në Shtetet e Bashkuara ka hapur dritën jeshile për miratimin e paktës 95 miliardë dollarëshe për Ukrainën.
Votimi procedural u miratua nga 316 ligjvënës, ndërsa 95 ishin kundër. Marrëveshja përfshin edhe paketat e ndihmave për Izraelin dhe Tajvanin. Demokratët në Dhomën e Përfaqësuesve morën anën e kryetarit republikan Mike Johnson për të kapërcyer opozitën e udhëhequr nga Taylor Greene, një besnike e Donald Trump.
Sakaq, votimi përfundimtar është lënë për të shtunën, ndërsa pas miratimit nga Dhoma e Përfaqësuesve ligjin pritet ta miratojë edhe Senati, aty ku demokratët janë shumicë. Masa ka të ngjarë të ndezë më tej konfliktet brenda konservatorëve të cilët janë kundër ndihmës shtesë për Ukrainën dhe kanë kërcënuar me mocion votimi për heqjen e Mike Johnson si kryetar i Dhomës së Përfaqësuesve.
Ndërkohë, Aleanca e Atlantikut të Veriut ka rënë dakord t’i sigurojë Kievit sisteme shtesë të mbrojtjes ajrore. Këtë e ka bërë të ditur shefi i NATO-s, Jens Stoltenberg, pas takimit të posaçëm të ministrave aleatë të mbrojtjes me Presidentin ukrainas Volodymyr Zelensky. Ky i fundit, në një deklaratë, kërkoi nga NATO që të tregojnë nëse janë vërtetë aleatët e Ukrainës.
“Ne po e themi këtë drejtpërdrejt. Për t’u mbrojtur, kemi nevojë për shtatë Patriotë të tjerë ose sisteme të ngjashme të mbrojtjes ajrore. Ata mund të shpëtojnë shumë jetë dhe vërtet të ndryshojnë situatën. Ju keni sisteme të tilla, ju lutem na i jepni! Putini duhet të zbresë në tokë dhe qielli ynë duhet të bëhet përsëri i sigurt. Zgjidhni, nëse jeta është me të vërtetë njësoj e vlefshme kudo. Zgjidhni, nëse keni qëndrim të barabartë ndaj të gjithë partnerëve. Zgjidhni, nëse vërtet jemi aleatë”, tha Zelensky.
Gjermania u zotua të furnizojë Kievin me një bateri të tretë Patriot nga rezervat e saj ushtarake, shkruan A2CNN. Shtetet e Bashkuara kanë numrin më të madh të sistemeve Patriot në inventarët e tyre. Ndërsa në Evropë, vende të tilla si Spanja dhe Greqia zotërojnë sistemin Patriot.
