Bordi i Zyrës së Rregullatorit të Energjisë ka marrë vendim që të zbritet energjia e shpenzuar mbi blloktarifë.
Lajmin për Klankosova.tv e ka konfirmuar kryetari i bordit të ZRRE-së, Ymer Fejzullahu, i cili tha se zbritja është 8 përqind.
“Për secilin konsumator të cilët shpenzojnë mbi 800 kilovatë, zbritja është 8 përqind. Po ashtu, kemi miratuar edhe zbritjen e energjisë për të gjitha bizneset, pa përjashtim, në vlerë prej 3 përqind, e edhe ndriçimit publik prej 3 përqind”, tha Fejzullahu, njofton Klankosova.tv. Në përllogaritje, një kilovat mbi blloktarifë me vendimin e ri është liruar për 1.16 cent për tarifën e lartë, ndërsa për tarifën e natës, zbritja nuk i bie as një cent i plotë.
Deri në këtë vendim, çmimi i energjisë për tarifën e lartë mbi blloktarifë, atë të ditës, ishte 14.45 cent, ndërsa tash është bërë 13.2 cent. Kurse, për tarifën e ulët mbi blloktarifë, çmimi ishte 6.81 cent, e që me zbritje i bie 6.27 cent.
