Presidenti amerikan Joe Biden ka thënë se planifikon të kandidojë në zgjedhjet e vitit të ardhshëm, por se ende nuk është gati ta shpallë zyrtarisht këtë. “Kam në plan të kandidoj për postin, por ende nuk jemi gati ta shpallim”, tha presidenti 80-vjeçar amerikan në një intervistë për televizionin NBC.
Deri më tani, pesë kandidatë kanë shpallur zyrtarisht kandidaturën e tyre për zgjedhjet presidenciale të vitit të ardhshëm.
Kush janë kandidatët?
Në mesin e republikanëve, ata janë ish-presidenti Donald Trump, ish-ambasadorja amerikane në Kombet e Bashkuara Nikki Haley, biznesmeni “anti-zgjuar” me origjinë indiane Vivek Ramaswamy dhe ish-guvernatori i Arkansas Asa Hutchinson, shkruan The New York Times.
NYT thekson se pritet edhe kandidatura e Ron DeSantis, i konsideruar si rivali më i madh i Trumpit, ndërsa përveç guvernatorit të Floridës, mediat amerikane përmendin edhe ish-zëvendëspresidentin Mike Pence, ish-sekretarin e shtetit Mike Pompeo dhe senatorit Tim Scott.
Nga ana demokrate, Marianne Williamson, ish-këshilltarja shpirtërore e Oprah Winfrey, e cila në kandidaturën e saj të fundit në 2020 bëri thirrje për krijimin e një ministrie të paqes, shpalli kandidaturën e saj.
Reuters shkroi javën e kaluar se në zgjedhje do të kandidojë edhe demokrati Robert F. Kennedy Jr., avokat dhe skeptik i vaksinave dhe politikës së jashtme amerikane, nipi i presidentit të vrarë amerikan John F. Kennedy.
