Çmendet tregu i zi për ndeshjen Shqipëri-Republika Çeke. Sfida e kësaj të shtune, është e para nga dy ndeshjet e mbetura në Nations League dhe që janë vendimtare për fitimin e grupit. Biletat dolën në shitje prej muajit shtator dhe interesi ka qenë shumë i lartë.
Stadiumi u cilësua “sold out” menjëherë pas fitores së Kombëtares më 14 tetor në Gjeorgji. Praktikisht një muaj përpara se kuqezinjtë të zbrisnin në fushën e lojës. Të gjitha biletat online u shitën, por kjo bëri që të lulëzonte tregu i zi.
Madje, shitjet në internet bëhen në mënyrë aq të hapur, sa duket se askujt nuk i bën përshtypje. E kundërta ndodh me çmimet e biletave, që janë nga 3 deri në 8-fish më të larta. Kosto e një vendi në stadium është stratosferike.
Rekordin e kanë stolat mbrapa portave, që nga çmimi fillestar prej 1.500 lekësh të reja, tashmë shiten 120 euro. Biletat në tribunat karshi, që dolën në shitje me 5,000 lekë të reja, kushtojnë 150 euro.
Interesi nga tifozët vijon të mbetet i madh dhe të gjithë shpresojnë që deri në momentin e fundit të jenë të pranishëm në mbështetje të Kombëtares. Megjithatë, prej abuzimit në tregun e zi, edhe pse u tha që stadiumi do të ishte i mbushur me kapacitet të plotë, rreziku që mbeten disa vende bosh në tribunat e Arenës Kombëtare është aktual.s.n.
