Platforma e njohur e rrjeteve sociale TikTok paralajmëroi për një ndërprerje të afërt për 170 milionë përdoruesit e tij në SHBA pasi Gjykata e Lartë miratoi ligjin për shitjen ose ndalimin e tij.
Sipas mediave të huaja, ligji detyron kompaninë mëmë në Kinë të shesë platformën deri më 19 janar, një ditë para se Donald Trump të kthehet si President i SHBA-së, ose në të kundërt, kompania duhet të përballet me një ndalim mbarëkombëtar.
“Nuk ka dyshim se, për më shumë se 170 milionë amerikanë, TikTok ofron një rrugë të veçantë dhe një hapësirë të madhe për shprehje”, shkroi Gjykata e Lartë në një opinion unanim të botuar të premten.
“Por Kongresi ka përcaktuar se ishte e nevojshme për të adresuar shqetësimet e tij të sigurisë kombëtare të mbështetura mirë në lidhje me praktikat e mbledhjes së të dhënave të TikTok dhe marrëdhëniet me një kundërshtar të huaj”, thuhej më tej në njoftim.
Pas vendimit, administrata e Joe Biden tha se presidenti në largim nuk do ta zbatonte ndalimin gjatë ditëve të tij të mbetura në detyrë.
Por TikTok tha se deklaratat nga Shtëpia e Bardhë si dhe nga Departamenti i Drejtësisë kishin “dështuar të ofronin qartësinë dhe sigurinë e nevojshme për ofruesit e shërbimeve që janë integrale për ruajtjen e disponueshmërisë së TikTok” në SHBA. Kompania shtoi: “Nëse administrata Biden nuk jep menjëherë një deklaratë përfundimtare për të kënaqur ofruesit e shërbimeve, për fat të keq TikTok do të detyrohet të zhduket më 19 janar.”
Sipas kushteve të ligjit, pa shitje, do të jetë e paligjshme që kompanitë të ofrojnë shërbime për shpërndarjen aplikacionit video, ose do të përballen me gjoba prej 5,000 dollarë për përdorues.
Mbetet e paqartë nëse grupet e teknologjisë si Apple, Google dhe Oracle, të cilat ofrojnë shërbime të tilla për TikTok në SHBA, do të merrnin rrezikun e vazhdimit të partneritetit me kompaninë gjatë fundjavës. Është gjithashtu e paqartë nëse aplikacioni mund të dalë jashtë linje qëllimisht, për të mbrojtur partnerët e tij, shkruan A2 CNN. Në një video të postuar në TikTok pas vendimit të gjykatës, shefi ekzekutiv i grupit Shou Zi Cheë nuk dha garanci nëse aplikacioni do të vazhdonte të funksiononte në SHBA të dielën, por e lavdëroi Trumpin.
Trump tha në një postim në Truth Social pas vendimit se vendimi i tij për TikTok do të merret në një të ardhme jo shumë të largët, por sipas tij, duhet të ketë kohë për të shqyrtuar situatën, duke shtuar se vendimi i gjykatës ishte “i pritshëm dhe të gjithë duhet ta respektoje atë”.
