Për bastisjen në zyrat e Korporatës Energjetike të Kosovës (KEK), ka folur Taulant Ferizi, avokat i drejtorit të KEK-ut, Nagip Krasniqi. Avokati Ferizi tha se gjendja shëndetësore e Krasniqit është përkeqësuar për shkak të “numrit të madh të forcave policore” dhe i njëjti është dërguar në QKUK për trajtim mjekësor.
Avokati Taulant Ferizi tha se klienti i tij është i pafajshëm dhe nga ajo që kanë mësuar kontrolli në zyret e KEK-ut është bërë për dy kontrata të nënshkruara në fushën e prokurimit.
Lexo Edhe:
Shëroni shpejt prostatën! Metoda është tashmë e disponueshme
Krahu i djathtë i Putin: Ka ardhur koha që Rusia të largohet nga Ukraina -…
“z.Krasniqi nuk është ndje mirë me shëndet, kanë ardhë edhe ekipet mjekësore që kanë konstatu se duhet të shtrihet në Emergjencë, atje ku gjendet momentalisht. Gjendja e tij shëndetësore është përkeqësu shkaku i numrit të madh të forcave policore. Z.Krasniqi duhet ta theksojmë se është tërësisht i pafajshëm dhe që presim që të mos ngritët aktakuzë ndaj tij, për shkak të mungesës së provave në procedurë. Po ashtu shumica e provave që janë marrë sot me anë të kontrollit duhet të konsiderohen si të papranueshme në procedurë penale, normalisht pa paragjyku verdiktin final nëse çështja do të shkojë në gjykatë”, tha avokati Ferizi për Gazetën Express.
Ai mohoi se Krasniqit i është thyer dera e banesës si dhe tha se deri më tani përveç kontrollit nuk është shoqëruar askush në polici.
“Nuk i është thyer dera e banesës, para 5 minutash isha me z.Krasniqi dhe zyrtarët policorë në QKUK, nuk ka refuzu, nuk i është thyer dera për aq sa kemi informacion. Te gjthë këto janë dezinformata”, mohoi avokati.
I pyetur se për çfarë arsyesh është zhvilluar bastisja në KEK, ai tha se kjo ka të bëjë me nënshkrimin e dy kontratave në fushën e prokurimit.
“Nuk na është dhënë informacion i mirëfilltë me cka ka të bëjë hetimi dhe kontrolli i sotëm, mirëpo nëpër rreshta është theksuar se bëhet fjalë për dy kontrata të nënshkruara në fushën e prokurimit, kaq kam për momentin”, tha ai për Express.
Avokati tha se e kanë kundërshtuar mënyrën e kontrollit.
“Fillimisht KEK në mëngjes sot është bastis, pa pas urdhër me shkrim të dhënë prej gjyqtarit të procedurës paraprake, policia kanë pas vetëm një urdhër gojor të dhënë prej gjyqtarit, ku nuk janë specifiku saktësisht, të paktën nëve nuk na është komuniku saktësisht se cilat janë provat që synohen të mirren me anë të kontrollit apo bastisjes. Ne kemi kundërshtu këtë mënyrë të kontrollit, pasi që e njëjta është në kundërshtim me kodin e procedurës penale, mirëpo kontrolli ka vazhdu”, u shpreh ai ndër të tjera.
Lidhur me këtë ngjarje, KEK ka thënë “janë të hapur për bashkëpunim me organet e rendit dhe do të ofrojë qasje të plotë në cilëndo kërkesë nga këto organe”.
Ndërsa, policia vetëm ka konfirmuar kontrollin duke thënë se për detaje të tjera do të informohet opinioni me kohë.
