Ministri në detyrë i Shëndetësisë, Armend Zemaj ka bërë të ditur se sot në orët e hershme të mëngjesit janë dërguar për trajtim në Turqi dy të lënduar nga shpërthimi në Ferizaj.
Ai po ashtu ka bërë të ditur se edhe dy të lënduar të tjerë janë në pritje të nisjes.
Ai me këtë rast ka falënderuar ambasadorin e Turqisë Çagri Sakar për angazhimin e pashoq për dërgimin në trajtim të pacientëve të lënduar në shtetin e tij.
Postimi i plotë:
Nëpërmjet dy aeroplanëve, sot herët në mëngjes, i përcollëm për trajtim në spitalet e Turqisë dy pacientët e parë në gjendje më të rëndë të lënduar nga eksplodimi i bombolës së gazit në Ferizaj, dy të tjerët janë në pritje të nisjes.
E falënderoj nga zemra ambasadorin e Turqisë në Kosovë, z. Sakar i cili me përkushtim të pashoq, u angazhua për trajtimin këtyre pacientëve që kanë pësuar djegie të shkallës më të lartë dhe janë më të rrezikuar.
Pacientët tjerë të lënduar nga shpërthimi i gazit, po marrin trajtim nga institucionet tona shëndetësore dhe profesionistët më të mirë që ka vendi, duke e bërë më të mirën e mundshme për secilin nga të lënduarit.
