Në hulumtimin e ri të KosovaNews, Klan Kosova del të jetë kampioni i ‘zhvatjes’ së Telekomit në tregun medial, i cili në emër të ‘marketingut’, për një periudhë 10 vjeçare, kishte arkëtuar mbi 1 milion euro nga Telekomi i Kosovës. Në periudha të ndryshme, përfitimi mujor arrinte edhe në shumën marramendëse prej mbi 28 mijë euro në muaj.
Që nga shpallja e Pavarësisë së Kosovës, dhjetëra miliona euro i janë zhvatur Telekomit të Kosovës nga mediat në emër të “marketingut”..
Përmes kësaj forme të kapjes dhe kontrollit të mediave, duke u dhënë para të majme nga institucionet shtetërore, shumica e të cilave përfundonin në xhepat e pronarëve, qeverisjet e kaluara kontrollonin shumicën e mediave në Kosovë.
Për pasojë shumica e mediave u shndërruan në tellallë të qeverive dhe politikat redaktoriale, bëheshin nga pronarët e mediave, duke i detyruar gazetarët e redaktorët të bënin autocenzurë kur në pyetje ishin kritikat apo ndonjë skandal që kishte të bënte me pushtetin.
Qeveria e Kosovës si aksionare e vetme e Telekomit të Kosovës, qysh nga shpallja e pavarësisë në vitin 2008 dhe me kalimin e kompetencave nga ndërkombëtaret te vendorët, filloi “aksionin” duke e gllabëruar këtë ndërmarrje publike dhe duke e futur në kthetrat e pushtetit.
Brenda 10 viteve, pra nga viti 2008 kur Telekomi gjeneronte dhjetëra miliona euro fitim vjetor, deri në vitin 2018, kjo ndërmarrje përfundoi në kolaps dhe në prag të falimentimit me dhjetëra miliona euro humbje.
Pjesë e këtij operacioni të zhvatjes padyshim ishin pothuajse shumica e mediave në Kosovë, të cilat përfituan miliona euro që telekomi u jepte në emër të “marketingut”.
Në bazë të një hulumtimi të publikuar në vitin 2020 nga Rrjeti i Gazetarisë Hulumtuese BIRN, Telekomi kishte ndarë miliona euro në emër të marketingut shumicës së mediave në Kosovë.
Duke ju referuar këtij hulumtimi, shifrat më të mëdha nëpër vite i kishin përfituar kryesisht mediat të cilat mbanin anën pushtetit, apo konsideroheshin të afërta më pushtetin.
Muajin e kaluar, KosovaNews raportoi se kompania e gazetarit Berat Buzhala, kishte përfituar plot 437 mijë euro vetëm nga Telekomi i Kosovës në emër të “marketingut”.
Por, çuditërisht në hulumtimin e BIRN të cilin e kishte financuar Bashkimi Europian nuk jepet asnjë e dhënë për televizionin “Klan Kosova”…?!
KosovaNews ka bërë një hulumtim të detajuar duke nxjerrë të dhëna zyrtare nga Telekomi i Kosovës. Në bazë të këtyre të dhënave del se është pikërisht televizioni “Klan Kosova” i cili është kampion sa i përket përfitimeve nga Telekomi i Kosovës.
1 milion e 289 mijë euro mori Klani i Devollëve nga Telekomi i Kosovës
Pas kërkesës për qasje në dokumentet publike, sipas të dhënave zyrtare të siguruara nga Telekomi i Kosovës, Klan Kosova ka përfituar gjithsej 1, 289,003 euro nga Telekomi i Kosovës në emër të “marketingut”
Në tabelën e përmbledhur të dërguar zyrtarisht nga zyrtarët e Telekomit të Kosovës, vërehet se qysh në vitin e parë të hapjes së televizionit Klan Kosova – në vitin 2009, ky televizion “sa për të marrë këmbët” kishte përfituar hiq më pak se 109 mijë euro nga Telekomi i Kosovës në emër të “marketingut”.
Por ajo që është interesante në këtë tabelë janë pikërisht vitet kur thuhej se Klan Kosovën e kishin blerë vëllezërit Devolli, në të cilën kohë drejtor ishte emëruar Baton Haxhiu. Në bazë të të dhënave të dërguara nga Telekomi, Klani i multimilionerëve Devolli kishte përfituar një “infuzion” prej afër 900 mijë euro për një periudhë 4 vjeçare – në vitet 2014-2018.
Edhe më interesante, duket fakti nëse analizohet viti 2015. Për një vit, përkatësisht 2015, Klan Kosova figuron t’i ketë zhvatur Telekomit të Kosovës shifrën astronomike prej 342 mijë e 293 euro, shumë kjo e dhënë kinse në emër të marketingut.
Nëse këtë shumë e ndajmë për muaj, atëherë i bie se Telekomi i Kosovës në atë kohë ka paguar për Klan Kosovën plot 28 mijë e 524 euro në muaj!
Përkundër shifrave të mëdha që merrte televizioni i Devollëve nga Telekomi i Kosovës, në anën tjetër ishte pikërisht oligarku Blerim Devolli i cili pikërisht në vitin 2015 e kishin paditur Telekomin e Kosovës më Gjykatën e Arbitrazhit me një skenar të mirëmenduar në bashkëpunim me qeveritarët e asaj kohe.
Në vitin 2015, “Z-Mobile” (Dardafon) iu drejtua Arbitrazhit pasi pretendonte se Telekomi i Kosovës po bënte shkelje të marrëveshjes pasi refuzonte t’i ndajë numra shtesë dhe të ofronte shërbime 3G dhe 4G.
Tribunali i Arbitrazhit pranë Odës Ekonomike Ndërkombëtare sipas padisë së kompanisë “Z-Mobile”, më 9 dhjetor 2016 vendosi në favor të kësaj kompanie. Sipas vendimit të Arbitrazhit, Telekomi i Kosovës obligohej që t’i alokonte numeracion shtesë “Z-Mobile”-it, si dhe t’i ofronte shërbimet 3G dhe 4G. E për dëmin e shkaktuar, Arbitrazhi e obligonte Telekomin që t’i paguante 30 milionë euro gjobë në emër të shpërblimit të dëmit, fitimit të humbur dhe shpenzimeve të procedurës së Arbitrazhit.
Për të gjitha këto të dhëna ne i kemi dërguar pyetje edhe ish-drejtorit të Klan Kosovës Baton Haxhiut për ta pyetur se: a kishte ndikuar ai duke i shfrytëzuar lidhjet e tij me politikën, më saktësisht me ish-kryeministrin Hashim Thaçi që t’i merren gjithë këto para Telekomit të Kosovës? Pastaj, A janë deklaruar këto para në Administratën Tatimore të Kosovës, si dhe pyetje të tjera.
Mirëpo deri në momentet e publikimit të këtij artikulli, Baton Haxhiu nuk është përgjigjur në asnjërën nga pyetjet e drejtuara ndaj tij.
Është pikërisht viti 2015 në kohën e koalicionit qeverisës PDK-LDK me kryeministër z.Isa Mustafa, kur televizioni Klan Kosova kishte thithur të hyra rekorde nga fondet publike. Ndërkohë në atë kohë në opinion përflitej se Klan Kosovën e kishin blerë vëllezërit Devolli, edhe pse në bazë të hulumtimeve ekskluzive që kishte bërë muaj më parë KosovaNews, emrat e Shkëlqim dhe Blerim Devollit nuk figurojnë askund në pronësinë e Klan Kosovës.
Skandali u thellua edhe më tepër ku në bazë të hulumtimit, u konstatua që pronësia e Klan Kosovës si dhe të gjitha pronësitë e kompanive të tjera të vëllezërve Devolli duke përfshirë “Art Motion”, “Devolli Group”, “Vitaland” “Energy Solar Developement” etj. ishin të regjistruara me dokumente të Serbisë. Menjëherë pas publikimit të këtyre hulumtimeve institucionet shtetërore morën masa duke iu pezulluar certifikatën e biznesitkëtyre kompanive duke përfshirë edhe televizionit Klan Kosova ndërsa rasti është duke u trajtuar në gjykatë.
Poashtu mediumi KosovaNews në një hulumtim ekskluziv publikoi edhe dokumentet e shtetësisë serbe të vetë Blerim Devollit i cili i kishte nxierr personalisht në Kragujevcë të Serbisë në vitin 2021.
Përgjatë 10 viteve pra deri në vitin 2020 Klan Kosova mori mbi një milion euro vetëm nga Telekomi i Kosovës pavarësisht ndërrimit të qeverive (PDK,LDK,AAK), ndërsa që nga ardhja e qeverisë Kurti I dhe Kurti II në bazë të të dhënave të dërguara nga Telekomi marketingu për Klan Kosovën është gjithsej 0 (zero) euro, jo vetëm për Klanin…!
