Është data 14 shkurt ajo që do të vendosë për përfaqësuesit e radhës në vendin tonë.
Qytetarët janë ata të cilët përmes votës së tyre do të zgjedhin së kush dëshiron të i përfaqësojë ata.
Tashmë fushatat parazgjedhore veçse kanë filluar, për të mos mjaftuar kjo aderimet e adresimet e liderëve po bëjnë “namin”.
Edhe pse situata me pandeminë po vazhdon të jetë e vështirë për vendin kjo nuk po i pengon liderët që të kenë tubimet e tyre me qytetarët mirëpo që së fundmi disa nga partitë politike janë dënuar për mos respektim të masave të COVID-19.
Mirëpo ajo se çfarë po luan rol në këto fushata parazgjedhore janë adresimet e subjekteve politike, e që disa po bëhen duke përmendur konkurrentët e tjerë.
Kështu ndodhi me adresimin e fundit të kandidatëtve për kryeministër nga radhët e PDK-së, Enver Hoxhaj, i cili përmes një video adresimi përmendi në vazhdimësi, kreun e VV-së, Albin Kurtin dhe kandidaten për presidente, Vjosa Osmani.
Hoxhaj në video adresimin e tij ceki ngjarjen e fundit në vend në lidhje me moscertifikimin e partive politike dhe deklaratën që Osmani e tha për KQZ-në, e që sipas tij ata që nuk respektojnë institucionet dhe ligjet nuk respektojnë as sakrificën e shumë brezave.
“Asnjë shtet s’mund të jetë i suksesshëm pa sundim të ligjit. Sundimi i ligjit është kusht elementar për një shtet funksional. Ata që nuk respektojnë këto institucione, ligjet, dhe Pavarësinë e Institucioneve, nuk respektojnë as sakrificën e shumë brezave”, u shpreh Hoxhaj.
Për të mos mjaftuar me kaq ai vazhdoi të flas për Kurtin e Osmanin duke thënë që është e rrezikshme teksa shohim Kurtin dhe Osmanin duke linçuar Gjykatën Kushtetuese dhe Komisionin Qendror të Zgjedhjeve.
“Është e frikshme teksa sot shohim disa politikanë duke kërcënuar pavarësinë e këtyre institucioneve. Është e rrezikshme se si Albin Kurti e Vjosa Osmani janë duke linçuar Gjykatën Kushtetuese dhe Komisionin Qendror të Zgjedhjeve”, tha tutje Hoxhaj.
Kjo mënyrë e adresimit të Hoxhaj u kritikua nga njohësit e çështjeve politike, të cilët për “Bota sot”, u shprehën që nuk është mënyra e duhur për të fituar vota.
Ata e cilësuan Hoxhajn si një politikan të qetë e të moderuar mirëpo që përmes kësaj rruge sipas tyre nuk mund të arrijë të ketë votën e qytetarëve.
Qarri: Zgjedhjet e 14 shkurtit të vitit 2021, pritet të shënojnë fundin e epokës së krimit të organizuar
Njohësi i çështjeve politike, Gani Qarri në një prononcim për “Bota sot”, ka komentuar në lidhje me zgjedhjet e parakohshme, adresimet e liderëve politikë që po bëhen për qytetarët e vendit.
Qarri u ndal tek adresimi i fundit i Hoxhajt i cili në fokus pat “sharjet” për Kurtin dhe Osmanin e që ishte qasja e gabuar për të iu drejtuar qytetarëve.
Sipas analistit që nga shpallja e pavarësisë me 17 shkurt të vitit 2008, pothuajse që të gjitha këto, ndodhen për fajin e ish udhëheqësit intrigant e manipulues të PDK-së, kuislingut Hashim Thaçi, kjo sepse e ka mbajtur për një dekadë nën thundër një popull të tërë.
“Zgjedhjet e 14 shkurtit të vitit 2021, ku Enver Hoxhaj duket të jetë vënë më tepër me detyrim, se sa me dëshirë në postin e kandidatit për kryeministër nga PDK, janë zgjedhjet e pesta parlamentare që mbahen parakohshëm, pa përfunduar mandatin e plotë asnjë legjislaturë dhe qeveri e deritanishme e formuar në këto vite në Kosovë, qysh nga shpallja e pavarësisë me 17 shkurt të vitit 2008, pothuajse e që të gjitha këto ndodhen për fajin e ish udhëheqësit intrigant e manipulues të PDK-së, kuislingut Hashim Thaçi, përçarësit më të madh të skenës politike në Kosovë”, tha Qarri.
Më tej, analisti përmend prokurorinë vendore e gjykatat, që nuk ndërmorën as edhe një hap karshi veprimeve që bëri Thaçi, derisa Gjykata Speciale në Hagë akuzoi ata me akuzat e rënda për krime lufte, duke i mbyllur në Hagë.
“Zgjedhje të cilat nga shumë vëzhgues të shquar evropiane dhe botërorë, me të drejtë konsiderohen si përfundimi i një epoke të rëndë e traumatike të zhvatjes, korrupsionit, nepotizmit dhe krimeve të organizuar, gjatë të cilës politikanë manipulatorë dhe të inkriminuar deri në fyt, si Thaçi & CO, mbi një dekadë e mbajtën nën thundër një popull të tërë, duke u bërë brenda nate multimilionerë, në një shtet të varfër dhe të sapo dalë nga lufta si Kosova, pa ofruar kurrë zgjidhje për qytetarët dhe popullin e saj të shumëvuajtur. Dhe përkundër ti gjithave, në fund nuk ishte prokuroria vendore as gjykatat e kapura të Kosovës, ato të cilat guxuan të ndërmerrnin çfarëdo hapi qoftë, kundër kriminelëve me nam,zhvatësve të vendit dhe kapësve brutalë të shtetit, por Dhomat e Specializuara të Gjykatës Speciale në Hagë. Ato konfirmuan akuzat më të rënda të mundshme penale për krime lufte dhe krime kundër njerëzimit kundër atyre që kishte kohë që kishin dalë mbi ligjin dhe kishin privatizu edhe shtetin e brishtë të Kosovës së pa-fat, me ta, mbi krye. Vetëm Specialja mundi t’i burgoste prijësit më famëkeqë të të gjitha të këqijave dhe veprimeve më të rënda kundërligjore në vend, duke i mbyllur Hashim Thaçin & CO në Hagë, ku tani presin fillimin e gjykimit për rreth 400 vrasje, shumica shqiptarë, plagosje, kërcënime, dhunë, torturë etj”, u shpreh Qarrri.
Njohësi i çështjëve politike vazhdon më tej të komentojë adresimin e Hoxhajt, adresim ky që është i paduhur dhe ndoshta mënyra më anakronike që dikush të votojë sërish PDK-në që sipas analistit, i ka humbur “rruga në oborr”.
Gjithashtu Qarri shprehet që z. Hoxhaj si kandidat për kryeministër, duket më tepër ta ketë marrë me ndonjë detyrim, këtë kandidaturë, se sa me dëshirë.
“Ndaj sulmet e kandidatit të PDK-së, për kryeministër, Enver Hoxhajt adresuar kundër Albin Kurtit dhe Vjosa Osmanit, gjoja për ndërtimin e karrierës nëpërmjet linçimeve, as që i shoh fare, si qasje të duhura e konstruktive, për t’i ftuar qytetarët në këtë mënyrë anakronike të votojnë sërish për PDK-në, partinë më të inkriminuar në vend me korrupsion, nepotizëm, zhvatje e krim të organizuar, por si kulmin e dëshpërimit të një protagonisti të traumatizuar nga tmerri për humbjen e madhe, që mund ta pres në votime, të quajtur Enver Hoxhaj. Madje pas konfirmimit të padisë nga Zyra e Prokurorit të Dhomave të Specializuara dhe arrestimit të kuislingut Hashim Thaçi dhe ish shefit të SHIK-ut, Kadri Veseli nga Gjykata Speciale, jo vetëm PDK-së, si parti, që i ka humbur tërësisht “rruga në oborr”, por edhe këmbsorët aktualë të tufës së saj, i propozuar, apo detyruar të kandidojë për kryeministër, Enver Hoxhaj, i ka rënë terri syve, nga frika e dështimit dhe humbjes epike, nga shqiptarët e frustruar. Ndaj përkundër qasjes së sëmurë, e në këto momente tepër të rënda edhe psikike, nëpër të cilat po kalon aktualisht PDK, edhe z. Hoxhaj si kandidat për kryeministër, duket më tepër ta ketë marrë me ndonjë detyrim, këtë kandidaturë se sa me dëshirë”, thekson analisti.
PDK asnjëherë nuk u distancua nga Thaçi
Qarri shprehet për faktin që Thaçi në mënyrë të hapur është akuzuar për krime lufte PDK asnjëherë nuk arriti të distancohet mirëpo që nëse vërtetohen këto akuza të shumta atëherë përveç Thaçit dhe Veselit mund të penalizohet edhe PDK si parti.
“Kjo për faktin se përkundër të gjitha tradhtive të hapura dhe konspirative që kuislingu Thaçi i ka bërë Kosovës dhe aktakuzës së formës më të rëndë të ngritur nga Specialja kudër tij për krime lufte dhe krime kundër njerëzimit, PDK kurrë nuk është distancuar nga Thaçi, nuk ka hequr dorë asnjëherë nga tradhtitë e tij dhe nuk i ka kundërshtuar as formalisht veprimet antikombëtare e antishtetërore të Thaçit, ndaj përgjegjësia që bie mbi Hoxhajn, është shumë herë më e madhe se sa që ai mund ta bartë mbi vete. Në anën tjetër, nëse dëshmohen edhe akuzat e shumta të ngritura në Hagë kundër Thaçit dhe vërtetohet se ai,jo vetëm ka urdhëruar por ka marrë pjesë direkt, edhe vet në vrasjen e shqiptarëve të pafajshëm, para dhe pas lufte, ka mundësi reale që të dënohet jo vetëm Thaçi dhe Veseli por të ndalohet së vepruari, për kohë të pacaktuar edhe PDK si parti”, thotë Qarri.
Në fund, analisti thekson që data 14 shkurt do të jetë përfundimisht përfundimi i një epoke të krimit të organizuar që u udhëhoq nga PDK-ja..
Gjithashtu ai cek që të bëmat kriminale të Thaçit nuk kanë të bëjnë me Osmanin e Kurtin për këtë arsye Hoxhaj nuk duhet të sillet kaq pa arsye karshi tyre.
“Kështu që zgjedhjet e 14 shkurtit të vitit 2021, përfundimisht pritet të shënojnë fundin e epokës së krimit të organizuar në vend, të udhëhequr nga PDK dhe fillimin e një epoke të re, për normalizimin e gjendjes dhe fillimin e ngritjes së aktakuzave të para edhe në Kosovë, vënien para drejtësisë dhe dënimit të të gjithë të inkriminuarve, shumica prej të cilëve, vinë nga partitë e ashtuquajtura të dala nga “lufta” me në krye kuislingun Hashim Thaçi, e që deri në këto zgjedhje, ishin të paprekshëm nga prokuroria dhe gjyqësia e korruptuar në vend. Kjo e mundon shumë edhe z. Hoxhaj, ndaj më duhet ta përsërisë edhe një herë se z. Hoxhaj, ka një hall të madh e të papërshkrueshëm, që po detyrohet të sillet kaq pa arsye duke u hedhur apriori në hakmarrje të mënyrës më primitive, kundër Kurtit dhe zonjës Osmani, sikur ata të ishin fajtorë për bëmat kriminale të Thaçit & CO, i rënë nën ndjesinë e fajit dhe vetmisë së pafund, pas mbylljes së kryebariut problematik të ish partisë, nga Specialja”, përfundoi Qarri për “Bota sot”.
Ahmeti: Keqqeverisja e PDK-së nuk amnistohet me një emër të kandidatit për kryeministër
Analisti politik, Hidajet Ahmeti në një bashkëbisedim me “Bota sot”, u shpreh që z. Hoxhaj po mundohet të adaptohet me pozitën prej një lideri dhe kandidati për kryeministër. Por që kjo mënyrë e adresimit të tij nuk është rruga e duhur për të sjellë vota.
“Kandidati për kryeministër nga radhët e PDK-së, zoti Hoxhaj po mundohet të adaptohet me pozitën prej një lideri të partisë dhe kandidati për kryeministër, por mënyra se si po i “sulmon” zoti Kurtin dhe znj. Osmani nuk është rruga që do t’i sjellë vota. Përkundrazi, zoti Hoxhaj është një person i qetë dhe politikan i moderuar , e nuk nderohet por as nuk fuqizohet politikisht duke përdorur strategjinë politike të PDK-së, por më shumë duhet të tregohet vetvetja”, tha Ahmeti.
Në fund, Ahmeti shprehet që z. Hoxhaj është vigjilent për ta parë që Kurti dhe Osmani ka përkrahje popullore dhe se sado që do të mundohet me këtë logjikë nuk do të arrijë të fitojë vota.
“Mendoj se, zoti Hoxhaj është vigjilent për ta kuptuar situatën faktike në përkrahjen popullore të listës së përbashkët në mes zoti Kurtit dhe znj. Osmani, dhe deklaratat e tij më shumë janë në kontekstin e fushatës zgjedhore e me qëllimin për ta dëmtuar sadopak përkrahjen popullorë për këtë listë. Por, gjykoj se zoti Hoxhaj sado që do të mundohet me këtë logjikë të tillë nuk do ta arrijë ta zbeh fitoren e listës së zotit Kurti dhe znj. Osmani, pasi bindja e keqe e opinionit publik për keqqeverisjen e PDK-së nuk amnistohet me një emër të kandidatit për kryeministër”, përfundoi Ahmeti për “Bota sot”.
