Ashtu siç edhe pritej, zgjedhjet europiane janë dominuar nga partitë e ekstremit të djathtë, të cilët kanë arritur rezultate të rëndësishme, duke tronditur peshën tradicionale të Partive Popullore Europiane dhe Social Demokratëve, si dhe duke detyruar Presidenti e Francës Emmanuel Macron ta çojë vendin në zgjedhje të parakohshme parlamentare, për herë të parë që nga viti 1997.
Për Macron beteja kundër Le Pen ishte një Vaterlo e kohëve moderne. Partia që ai drejton e grupimit Renew, ka pësuar humbje nga ekstremi i djathtë i rivales së tij historike Marine Le Pen, duke marrë vetëm 80 vende në Parlamentin e ardhshëm europian. Macron foli para mediave, duke njoftuar datën 30 qershor dhe 7 korrik për zgjedhjet parlamentare.
“Pasi konsultova nenin 12 të Kushtetutës sonë, vendosa t’ju kthej zgjedhjet për të ardhmen e parlamentit tonë. Sot po shpërndaj Kuvendin Kombëtar. Ky vendim është serioz, i vështirë, por mbi të gjitha është një akt besimi – besim tek ju, bashkëqytetarët e mi, në aftësinë e popullit francez për të bërë zgjedhjen më të drejtë për veten dhe për brezat e ardhshëm, besimin te demokracia, në mënyrë që zëri t’u jepet njerëzve sovran, asgjë nuk mund të jetë më republikane. Kjo është më mirë se çdo marrëveshje, apo çdo zgjidhje të pasigurt”, tha Emmanuel Macron, President i Francës.
Për kundërshtaren e Macron, Marine Le Pen, grupimi ku partia që ajo drejton bën pjesë, ka marrë 58 vende në Parlamentin Europian. Për Le Pen ky ishte rezultati më i lartë në 40 vite.
“Francezët kanë folur dhe këto zgjedhje historike tregojnë se kur populli voton, populli fiton. Duke dhënë më shumë se 32% në listën e Bashkimit Kombëtar, francezët sapo na kanë dhënë rezultatin më të lartë, në 40 vjet. Është një emocion i vërtetë të shohësh këtë forcë të bukur popullore duke u ngritur në të gjithë vendin”, u shpreh Marine Le Pen, Rassemblement National.
Ashtu si Macron, kancelari gjerman, Olaf Scholz, u përball me një natë të dhimbshme ku socialdemokratët e tij shënuan rezultatin e tyre më të keq, duke vuajtur përballë konservatorëve dhe Alternativës së djathtë për Gjermaninë. Ndërkohë, kryeministrja italiane Giorgia Meloni forcoi pozitat nga grupimi i saj konservator “Vëllezërit e Italisë”, e cila fitoi shumicën e votave.
Një zhvendosje djathtas brenda Parlamentit Evropian mund ta bëjë më të vështirë miratimin e legjislacionit të ri që mund të jetë i nevojshëm për t’iu përgjigjur sfidave të sigurisë, ndikimit të ndryshimeve klimatike ose konkurrencës industriale nga Kina dhe Shtetet e Bashkuara.
Parlamenti do të mund të jetë edhe më i përçarë, çka do të vështirësojë miratimin e ndonjë vendimi të rëndësishëm, teksa BE-ja përballet me një Rusi armiqësore dhe rritje të rivalitetit me Kinën, në fushën e industrisë, shkruan A2CNN . Rreth 370 milionë europianë kishin të drejtë vote për të zgjedhur 720 anëtarë të rinj të Parlamentit Europian mes 15 mijë kandidatëve.
