FIFA rrezikoi një “skandal diplomatik” disa ditë më parë. Gjatë prezantimit të shortit për Kupën e Botës 2026, që do të zhvillohet në Amerikën e Veriut (Shtetet e Bashkuara, Kanada dhe Meksikë), institucioni më i lartë ndërkombëtar i futbollit tregoi një hartë gjeografike të Europës ku Krimeja ishte e përjashtuar nga territori ukrainas.
Reagimi i qeverisë së Kievit erdhi pothuajse menjëherë: “Gjithçka në rregull, FIFA? E kemi korrigjuar hartën për ju dhe po presim një ndjesë publike,” shkroi në rrjetet sociale Heorhiy Tykhy, zëdhënës i Ministrisë së Jashtme, duke publikuar një imazh “të korrigjuar”, ku rajoni i Krimesë përfshihet sërish në Ukrainë.
“Duke ridimensionuar kufijtë ndërkombëtarë, FIFA jo vetëm që ka shkelur të drejtën ndërkombëtare, por gjithashtu ka mbështetur propagandën ruse, krimet e luftës dhe agresionin kundër Ukrainës.”
Të shtunën e kaluar, një zëdhënës i FIFA-s deklaroi për BBC: “FIFA është në dijeni të një problemi që lidhet me një nga imazhet e shfaqura gjatë shortit dhe e ka adresuar çështjen me Federatën Ukrainase. Imazhi në fjalë është hequr.”
Qëllimi origjinal i hartës në fjalë ishte të tregonte vendet që nuk mund të ndesheshin mes tyre për shkak të tensioneve gjeopolitike, si Ukraina dhe Bjellorusia, Spanja dhe Gjibraltari, Kosova dhe Bosnja e Hercegovina, apo Serbia.
