Kosova do të përfaqësohet me tri sportiste në Grand Slamin e xhudos që mbahet në Abu Dabi të Emirateve të Bashkuara Arabe prej së premtes deri të dielën.
Erza Muminoviq, Flaka Loxha dhe Dëbora Gjakova do të jenë mes 221 xhudistëve nga 29 vende të ndryshme në këtë event.
Sa u takon xhudisteve të Kosovës, gara është me peshë për të fituar pikë të shumta në ranglistën botërore dhe po ashtu për të fituar përvojën e nevojshme në garat e nivelit të lartë.
Të premten garojnë Erza Muminoviq në kategorinë deri 52 kilogramë dhe Flaka Loxha në kategorinë deri 57 kilogramë. Të shtunën është radha e Dëbora Gjakovës, që garon në kategorinë deri 63 kilogramë.
Grand Slami në Abu Dabi është gara e dytë e Turit Botëror të Xhudos pas Lojërave Olimpike. Në Grand Prix, në Zagreb, një muaj më parë, Flaka Loxha fitoi medalje të bronztë në kategorinë deri 52 kilogramë.
Xhudistët kryesorë të Kosovës, Distria Krasniqi, Nora Gjakova, Laura Fazliu e Akil Gjakova nuk janë kthyer ende në gara pas Lojërave Olimpike.
Delegacioni i Kosovës në në Grand Slamin e Abu Dabit udhëhiqet nga Majlinda Kelmendi.s.n.
