Dy fëmijë të moshës 5 dhe 6 vjeç janë në gjendje kritike për jetën pasi u plagosën gjatë një sulmi me armë në shkollën Feather River Adventist, në qytetin Oroville, rreth 110 kilometra në veri të Sacramento-s.
Sherifi i Qarkut Butte, Kory Honea, tha në një konferencë për shtyp se të plagosurit po trajtohen në spitalet lokale dhe se gjendja e tyre mbetet kritike. “Jam mirënjohës që janë ende gjallë, por kanë një rrugë të gjatë përpara,” u shpreh Honea.
Autori i dyshuar i sulmit u gjet i pajetë në vendngjarje dhe dyshohet se ëshjtë vetëvrarë. Identiteti i tij është zbuluar, por nuk është bërë publik për shkak të hetimeve që po kryhen me ndihmën e FBI-së. Sipas informacioneve paraprake, sulmuesi kishte vënë në shënjestër shkollën për shkak të lidhjes së saj me Kishën Adventiste të Ditës së Shtatë.
Më herët gjatë ditës, i dyshuari kishte marrë pjesë në një takim me një administrator të shkollës, duke pretenduar se ishte i interesuar për regjistrimin e një anëtari të familjes, shkruan A2 CNN. Autoritetet po hetojnë nëse takimi ishte një justifikim për të hyrë në kampus.
Ngjarja ndodhi rreth orës 13:08 të së mërkurës, kur autoritetet morën telefonata për një sulm me armë në shkollë. Brenda dy minutash, një oficer patrulle mbërriti në vendngjarje, ku u gjet një pistoletë pranë trupit të autorit. Efektivët e zyrës së Sherifit mbërritën disa minuta më vonë dhe ofruan ndihmën e parë për të plagosurit. Nxënësit e tjerë u transportuan me autobus në një kishë të afërt për t’u ribashkuar me prindërit e tyre.
