Në Prishtinë po mbahet ceremonia e hapjes së ‘Javës Evropiane të Mobilitetit”.
Përmes kësaj ngjarje, po synohet të promovohet mënyra e qëndrueshme e transportit dhe të inkurajohet përdorimi i biçikletave dhe transportit publik.
Me këtë rast, kryetari i Prishtinës, Përparim Rama tha se po punojnë që të bëhen ndryshime për një kryeqytet sa më të pastër e të gjelbër.
“Është një javë e rëndësishëm jo vetëm për qytetin tonë por për mbi 3 mijë qytete evropiane që punojnë për një qëllim, që të krijojmë qytete sa më të pastërta e të këndshme për të jetuar në to. Puna nuk është vetëm si të lëvizim por është se si të krijojmë një qytet më të gjelbër dhe shumë të shëndetshëm dhe të pastër. Për here të parë ne kemi sjell biçikletat e qytetit. Çdo ditë po krijojmë shtigje të reja për biçikleta. Po ashtu kemi edhe trafikun urban. Ndërsa, këtë javë do të nënshkruajmë marrëveshje edhe me sektorin privat ku biletat do të kushtojnë njëjtë si në atë publik”, tha ai.
Ndërsa, Jeton Raka, zv.ministër i Ministrisë së Mjedisit kërkoi nga komunat që të zhvillojnë plane të qëndrueshme të mobilitetit.
“Qytetari ynë ka nevojë për ndërgjegjësim e informim. Qytetari ka të drejtë mjedisore e cila i garantohet edhe me kushtetutë edhe me ligj. Ministria e Mjedisit bashkë me Ministrinë e Arsimit, Policinë e Kosovës, komunat, organizatat joqeveritare maraklitë e biçikletave, do të shënojnë “Javën Evropiane të Mobilitetit”. Kërkesa jonë është që të përdorni sa më shumë mjete alternative për lëvizje. Kërkesa jonë për komunat është që të zhvillojnë plane të qëndrueshme të mobilitetit”, shtoi ai.
Gjatë ceremonisë u kërkua që qytetarët të ngrisin zërin për një ambient më të pastër, shkruan rtk.Ndërsa, nga organizata marakli të biçikletave patën ankesa se përkundër ceremonive të tilla, pak punë po kryhen në këtë drejtim.
