Njësia e Antidrogës në Policinë Rajonale në Gjilan ka zhvilluar mbrëmë një aksion, në kuadër të së cilit janë kryer bastisje në disa lokacione, që kanë rezultuar me sekuestrimin e sasive të ndryshme të drogës, si dhe arrestimin e disa personave. Për dy raste të ndara, Gazeta Sinjali ka raportuar sot, teksa burimet kanë bërë me dije për arrestimin edhe të dy personave të tjerë, të dyshuar për shitblerje të drogës.
Burimet nga Prokuroria kanë bërë me dije se të dyshuarit që u kapën në lokacione të ndryshme mbrëmë në Gjilan janë Arben Jakupi, Arian Shala, si dhe dy të arrestuarit e fundit Dritëro Azemi dhe Liridon Musliu. Arrestimi i këtyre të fundit u përcoll edhe me incidente.
Siç merr vesh Sinjali, dy të dyshuarit janë në mesin e personave të identifikuar nga Drejtoria për Hetimin kundër Trafikimit me Narkotikë, nën dyshimin se kanë bërë shitjen dhe shpërndarjen e narkotikëve në disa lagje të komunës së Gjilanit.
Musliu dhe Azemi janë kapur nga Policia në rrugën “Esat Stavileci” në Gjilan, ku u kapën në flagrancë me një sasi të konsiderueshme të narkotikëve. Të njëjtat burime thonë se të dyshuarit kanë tentuar t’iu shpëtojnë prangave të Policisë, por nuk kanë arritur të ikin.
Policia ka hasur në rezistencë për kapjen e tyre dhe si rezultat dy hetues policorë kanë pësuar lëndime trupore, për çka kanë marrë trajtim mjekësor në Emergjencën e Gjilanit.
Droga që iu gjet të dyshuarve është sekuestruar, ndërkaq të dyshuarit janë dërguar në mbajtje për 48 orë, nën dyshimin se kanë kryer veprat penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, “Lëndim i lehtë trupor” dhe “Sulm ndaj personit zyrtar”.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.