Një delegacion i Komisionit Qendror të Zgjedhjeve, së bashku me drejtues të institucioneve zgjedhore nga vende të ndryshme evropiane dhe ekspertë ndërkombëtarë të fushës, mori pjesë në Konferencën e 20-të Europiane të Trupave Menaxhuese të Zgjedhjeve, mbajtur në kryeqytetin lituanez, Vilnius, me temën “Stabiliteti i Ligjit Zgjedhor – Aspektet Praktike”.
Në këtë konferencë morën pjesë Kryesuesi i KQZ-së, Kreshnik Radoniqi, dhe ushtruesi i detyrës së Drejtorit të Sekretariatit të KQZ-së, Besnik Buzhala.
Gjatë punimeve të konferencës u diskutuan tema të ndryshme të lidhura me proceset zgjedhore, me theks të veçantë te rregullat që përcaktojnë të drejtën për të votuar dhe për t’u kandiduar, përfshirë regjistrimin e votuesve dhe kandidatëve.
Po ashtu, pjesë e diskutimeve ishin edhe modalitetet për ndarjen e kufijve të zonave zgjedhore dhe qendrave të votimit, si dhe votimi nga jashtë vendit.
Një pjesë e rëndësishme e agjendës iu kushtua rregullave që zbatohen në procesin e votimit dhe numërimit të votave, përfshirë transmetimin e rezultateve, me fokus në prezantimin e modaliteteve dhe teknologjive të reja në këtë proces.
Vëmendje e veçantë iu kushtua edhe rregullimeve ligjore që kanë të bëjnë me kontrollin financiar të partive politike gjatë vitit kalendarik dhe gjatë fushatave zgjedhore.
Konferenca u bashkëorganizua nga Komisioni Qendror i Zgjedhjeve i Republikës së Lituanisë dhe Këshilli për Zgjedhje Demokratike i Këshillit të Evropës.
