Ministri i Parë i Skocisë, Humza Yousaf, ka kritikuar ashpër Sekretarin e Jashtëm britanik James Cleverly se nuk i ka përmendur qytetarët britanikë të bllokuar në Gaza në postimin e tij të fundit në rrjetet sociale, raporton Anadolu.
Postimi i Cleverlyt në “X” përshkroi qëllimet e tij për takimet e ardhshme në Egjipt, Katar dhe Türkiye, por në mënyrë të dukshme nuk iu referua situatës së rëndë të qytetarëve britanikë në Gaza.
Në përgjigjen e tij ndaj postimit të Cleverlyt, Yousaf shprehu zhgënjimin e tij.
“Është e turpshme që qytetarët e Mbretërisë së Bashkuar të bllokuar në Gaza as nuk përmenden. Mund të jetë e dobishme nëse i përmendni ata të paktën me një përmendje kalimtare në diskutimet tuaja”, tha ai.
“Ata janë bllokuar në një zonë lufte dhe kanë nevojë që ju, Sekretar i Jashtëm, të kërkoni një armëpushim dhe të hapet kalimi në Rafah për t’u mundësuar atyre të dalin që aty”, shtoi Yousaf.
Prindërit e gruas së Yousafit janë bllokuar në Gaza mes konfliktit të përshkallëzuar midis grupit palestinez Hamas dhe Izraelit.
Gruaja e tij, Nadia El-Nakla, është me origjinë palestineze dhe prindërit e saj ishin në Gaza për të vizituar familjen kur filloi shpërthimi i fundit i dhunës, duke rezultuar në mijëra viktima.
Javën e kaluar, Yousaf ndau një video prekëse nga vjehrra e tij, Elizabeth El-Nakla.
“Kjo mund të jetë videoja ime e fundit. Të gjithë në Gaza po lëvizin drejt vendit ku jemi ne. Një milion njerëz, pa ushqim, pa ujë dhe akoma forcat izraelite po i bombardojnë teksa largohen”, tha El-Nakla duke qarë.
Konflikti në Gaza, e cila ka qenë nën bombardimet izraelite dhe një bllokadë që nga 7 tetori, filloi kur grupi palestinez Hamas nisi operacionin “Tufani i Al-Aksasë”, një sulm i papritur i shumëdimensional që përfshinte lëshimin e një breshërie raketash dhe infiltrimesh në Izrael nga toka, deti dhe ajri.
Ushtria izraelite më pas nisi operacionin “Shpata e Hekurt” në Rripin e Gazës.
Gaza po përjeton një krizë të rëndë humanitare pa energji elektrike, ndërsa uji, ushqimi, karburantet dhe furnizimet mjekësore po mbarojnë.
Sekretari i Përgjithshëm i OKB-së, Antonio Guterres, ka bërë thirrje për një armëpushim të menjëhershëm humanitar për të lehtësuar “vuajtjet epike njerëzore”.
Të paktën 3.785 palestinezë janë vrarë në sulmet izraelite në Gaza, ndërsa më shumë se 1.400 izraelitë janë vrarë gjatë konfliktit.
