Kryetari i Lidhjes Demokratike të Kosovës, Lumir Abdixhiku, kujton heroin Afrim Bunjaku, në njëvjetorin e vrasjes në sulmin e grupeve kriminale serbe në Banjskë të Zveçanit.
Ndërsa kujton heroizmin e tij në mbrojtje të vendit, Abdixhiku tha se “Afrim Bunjaku është Heroi i cili sakrifikoi jetën e tij për shtetin e Kosovës dhe se shembulli i tij është model dhe motiv për brezat se si mbrohet e si duhet shërbyer atdheut edhe në kohë paqeje”.
“Vrasja e heroit Bunjaku ishte goditje e rëndë jo vetëm për familjen dhe kolegët policë, por edhe për shtetin e Kosovës. Prandaj dënimi i terroristëve si dhe mbajtja përgjegjës e Serbisë si organizator i agresionit ndaj Republikës janë detyrime tona si shtet e si shoqëri. Afrim Bunjaku mbetet përherë në kujtesën shtetërore si personalitet që dha frymën e fundit për territorin e Republikës së Kosovës. I përjetshëm kujtimi e nderimi për Afrim Bunjakun. Lavdi e përjetshme!”, shprehet Abdixhiku.
