Kryetari i AAK-së, Ramush Haradinaj, kujton vëllezërit Bytyqi, shtetas amerikanë, që u arrestuan në vitin 1999 në Serbi, ndërsa i liruan nga burgu , por më pas i vranë, përcjell Kosova Post.
Haradinaj, ndërsa kujton Agron, Yll e Mehmeti Bytyqin, u shpreh se të tre vëllezërit kishin lënë ëndrrën amerikane për t’iu bashkuar UÇK-së.
“Agron, Yll dhe Mehmet Bytyqi, shtetas amerikanë, si shumë vëllezër e motra kishin lënë ëndrrën amerikane për t’iu bashkuar Ushtrisë Çlirimtare në momentet më vendimtare për Atdheun.”, tha Haradinaj.
Tutje, Haradinaj thekson se Serbia vazhdon me injorimin e krimeve dhe dekorimin e kriminelëve të luftës, mes tyre edhe ata që dyshohen se vranë vëllezërit Bytyqi.
“Shteti serb përpos që i ekzekutoi pa gjyq, vazhdon me injorimin e krimeve dhe me dekorimin e kriminelëve të luftës, mes tyre edhe ata që dyshohen se vranë Vëllezërit Bytyqi”, tha Haradinaj.
Heroizimi i tyre tha Haradinaj do të kujtohet gjithmonë.
“Sot e çdo ditë ne ndajmë dhembjen e krenarinë me familjen Bytyqi – me bacën Ahmet e me zonjën Bahrije dhe bashkëluftëtarët e “Atlantikut”. Shpirti human, atdhedashuria dhe heroizmi i tyre, do të përkujtohen gjithmonë!”. u shpreh Haradinaj.
