Kryeministri i Kosovës, Albin Kurti i ka ftuarë liderët e tri partive parlamentare opozitare, Partisë Demokratike të Kosovës, Lidhjes Demokratike të Kosovës dhe Aleancës për Ardhmërinë e Kosovës për të diskutuar rreth përmbushjes së agjendës legjislative për sezonin pranveror.
Kurti në letrën të cilën ua ka dërguar tri partive opozitare thekson se arsyeja pse ka takuar krerët e partive dhe shefat e grupeve parlamentare ka të bëjë me atë që të diskutohen hapat për përmbushjen e agjendës legjislative.
Por, a pritet t’i përgjigjen pozitivisht ftesës së Kurtit krerët e partive opozitare?
Zëdhënësi i Partisë Demokratike të Kosovës, Faton Abdullahu në një deklaratë për Telegrafin tha se PDK ka pranuar ftesën e kryeministrit Albin Kurti për një takim pune për të hënën.
Abdullahu tha tutje se kryetari i partisë, Memli Krasniqi do të merr pjesë në takim. “Mund ta konfirmoj që kryetari Memli Krasniqi do të marrë pjesë në këtë takim”, tha ai.
Zëdhënësi i PDK-së tutje tha se qëndrimi i tyre si PDK është i qartë dhe konsistent, se Kosova është në krizë në çdo fushë dhe rrugëdalje e vetme janë zgjedhjet e parakohshme parlamentare, të cilat duhet të mbahen sa më parë.
“…Prandaj edhe pjesëmarrja e kryetarit Krasniqi në këtë takim do të jenë në funksion të diskutimit për mundësinë e caktimit të datës për zgjedhje të reja”, tha Abdullahu për Telegrafin.
Ndërkaq, zëdhënësi i Lidhjes Demokratike të Kosovës, Besian Mustafa në një deklaratë për Telegrafin tha se LDK ka pranuar ftesën, por lidhur me atë se a do të marrin pjesë ose jo do të njoftojnë siç tha “me kohë”.
“Konfirmoj se kemi pranuar ftesën e z.Kurtit”, tha Mustafa.
I pyetur se a do të marrin pjesë në takim, zëdhënësi i LDK-së tha shkurt “do t’ju njoftojmë me kohë”.
Edhe zëdhënësi i Aleancës për Ardhmërinë e Kosovës, Kushtrim Xhemaili ka konfirmuar për Telegrafin se AAK ka pranuar ftesën për takim të hënën, në ora 18:30, ndërkaq janë në shqyrtim të ftesës se a do të marrin pjesë apo jo.
“Mund të ju konfirmoj që kryetari Ramush Haradinaj bashkë me drejtuesin e grupit parlamentar të AAK-së, Besnik Tahiri, kanë pranuar ftesë nga z. Kurti për takim, të hënën në ora 18:30. Ndërkaq, sa i përket pjesëmarrjes, jemi ende në shqyrtim”, tha ai. /Telegrafi/
Kuvendi i Kosovës me muaj të tërë nuk po arrin t’i miratojë marrëveshjet ndërkombëtare në mungesë kuorumi.
Opozita ka bojkotuar votimin e tyre për shkak siç deklaronin të situatës politike në vend dhe mungesës së konsensusit për çështje të brendshme.
