Ministri i Mbrojtjes, Ejup Maqedonci, bën të ditur se në kuadër të forumit “Defence 24 Days” është takuar me homologun polak, Władysław Kosiniak- Kamysz.
Tutje, ministri i Mbrojtjes thekson se gjatë takimit me homologun kanë diskutuar për sigurinë, derisa ka njoftuar ministrin polak për situatën e së sigurisë në Kosovë dhe rajon.
Ndërkohë me homologun polak, ministri Maqedonci ka ndarë edhe informatën për 48 bazat e ushtrisë serbe të vendosura përgjatë vijës kufitare me Kosovën.
Ndërkohë që i ka shprehur edhe dyshimet se grupet terroriste po mbështeten nga strukturat e sigurisë të shtetit të Serbisë me qëllim për të shkaktuar destabilizimin e Kosovës dhe Ballkanit.
“Ministrin Kamysz e informova rreth situatës së sigurisë në vend dhe rajon, gjersa shpreha dhe shqetësimin tim për militarizimin e Serbisë dhe 48 bazat e ushtrisë dhe gjandarmërisë serbe të vendosura përgjatë vijës kufitare me Kosovën, e gjithashtu dyshimin e bazuar me rastin e sulmit në Banjskë që grupet terroriste po mbështeten nga strukturat e sigurisë të shtetit të Serbisë me qëllim për të shkaktuar destabilizimin e Kosovës dhe Ballkanit në përgjithësi.”
Ndryshe, ministri Maqedonci është shprehur se Kosova do të vazhdojë të ofrojë mbështetje për Ukrainën.
“Duke qenë të vetëdijshëm se lufta në Ukrainë kërcënon sigurinë e përgjithshme të Evropës, theksova që Kosova do të vazhdoj të ofroj mbështetjen e pakursyer për Ukrainën brenda kapaciteteve tona shtetërore.”, tha ministri.
Ministri Maqedonci bëri të ditur gjithashtu se me homologun polak janë dakorduar për vendosje të bashkëpunim në fushën e mbrojtjes mes dy shteteve.
