Prokuroria Themelore në Prishtinë ka bërë të ditur se veprimet hetimore në çështjen hetimore ndaj ambasadorit të Kosovës në Kroaci, Martin Berishaj, për dyshimin në veprën penale “mos-raportim apo raportim i rremë i pasurisë”, janë duke vazhduar.
Lajmin për Klankosova.tv e ka konfirmuar zëdhënësja e Prokurorisë Themelore, Laureta Ulaj.
“Mund t’iu njoftojmë lidhur me kallëzimin penal kundër M.B., në drejtim të veprës penale ‘Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare’, nga neni 430 të KPRK-së, se në këtë çështje penale janë duke u ndërmarrë veprime hetimore nga ana e Prokurorit të Shtetit”, është shprehur Ulaj.
Kujtojmë se ambasadori i Kosovës në Kroaci, Martin Berishaj, nuk e kishte raportuar kompaninë e tij “MB Consulting” në Agjencinë Kundër Korrupsion gjatë deklarimit të pasurisë.
Për këtë rast, një medium në Slloveni, “Prava“, ka raportuar ditëve të fundit.
