Në një intervistë të gjatë për ‘Corriere dello Sport’, José Mourinho, një nga figurat më polemizuese në botën e futbollit, ka folur pa dorashka me drejtorin e gazetës, Ivan Zazzaroni. Gjatë intervistës, Mourinho ka trajtuar tema të shumta, duke kritikuar ashpër disa aspekte të futbollit modern:
“Futbolli është mbretëria e sipërfaqësisë dhe klisheve, ku çdokush merr një etiketë. Zakonisht, kur njerëzit flasin për mua, mendojnë për atë që ka ndodhur pesëmbëdhjetë, dymbëdhjetë, tetë ose dhjetë vite më parë. Kush janë fenomenët e futbollit? Trajnerët e mirë që nuk dinë të fitojnë, ekspertët e rrjeteve sociale dhe njerëz që kanë pushtet vendimmarrës, por që dinë për futboll aq sa di unë për fizikën e atomit.”
Mourinho ka ndarë gjithashtu disa pengje për zgjedhjet profesionale në të kaluarën, duke përmendur refuzimin e ofertës nga Florentino Perez, president i Real Madridit:
“Nuk u riktheva në Madrid sepse doja të kthehesha te Chelsea pas tri viteve të vështira në Spanjë.”
Lidhur me periudhën e tij te Roma, Mourinho pranoi:
“Duhet të isha larguar pas Budapestit, jo për kaosin e shkaktuar nga Taylor, por për faktin që nuk u largova menjëherë. Duhej ta lija Romën, nuk e bëra dhe ky ishte gabim.”.s.n.
