Ronald Koeman e ka bërë listën e ngushtë të dëshirave për afatin kalimtar të janarit, ndërsa emri i Shkodran Mustafit ndodhet në listën e trajnerit të Barcelonës.
Lëndimet e Gerard Pique dhe Ansu Fati i kanë detyruar Blaugranët që të mendojnë për përforcimin e skuadrës në afatin kalimtar dimëror.
Memphis Depay i Lyonit vazhdon të jetë dëshira kryesore e Koeman për fazën e sulmit, mirëpo kriza financiare e klubit është duke e pamundësuar transferimin e tij.
Lëndimi i Pique, mungesa e Ronald Araujo, problemi i vazhdueshëm i Samuel Umtitit me gjurin dhe lëndimi më i fundit i Clement Lenglet, e ka detyruar trajnerin të mendojë për një qendërmbrojtës.
Sipas Mundo Deportivo, Koeman e ka të preferuar ish-lojtarin e Akademisë së Barcës që tash luan te Manchester City, Eric Garcia.
Nëse Citizens e bindin spanjollin të qëndrojë në Etihad, atëherë dy opsionet tjera janë: Shkodran Mustafi (Arsenal) dhe Antonio Rudiger (Chelsea), të cilët kanë shumë pak hapësira te skuadrat e tyre. /tlg
