Kryetari i Bashkësisë Islame të Kosovës, Myftiu Naim ef. Tërnava, mori pjesë në Samitin online të liderëve fetarë myslimanë në botë, i organizuar nga Dijaneti i Turqisë, e që për temë kishte sulmet që kishin në shënjestër Kuranin, të cilat ndodhen në Suedi dhe në Holandë, përcjell Kosova Post.
Në këtë Samit u theksua se derisa bota islame me padurim po e pret muajin e bekuar Ramazan, në të cilin është zbritur Kurani, kemi parë nivelin e frikshëm nga individë ekstremist armiqësor ndaj Islamit, të cilët kanë bërë djegien e Kuranit dhe me këtë kryer një akt provokimi, por edhe urrejtje që për synim ka jo tolerancën, mbjelljen e urrejtjes, dhe jo harmonisë ndërfetare.
Nga ky Samit u vlerësua se këto veprime janë të ulëta dhe fyejnë vlerat tona të shenjta dhe përmbajnë krim të urrejtjes, janë një shpallje e hapur se islamofobia, diskriminimi dhe ksenofobia nuk njohin më kufij.
Kryetari i Dijanetit, Ali Erbash, në këtë Samit duke iu drejtuar liderëve fetarë myslimanë në botë, tha se të gjithë intelektualët, akademikët, aktivistët, organizatat joqeveritare, anëtarët e mediave dhe njerëzit me mendje të drejtë që besojnë në ligj dhe të drejtat e njeriut dhe që kanë prioritet respektimin e besimit dhe paqes sociale në Evropë, duhet të ngrenë zërin kundër këtyre sulmeve të hapura kundër të shenjtës.
Duhet theksuar se politikani danezo-suedez i ekstremit të djathtë, Rasmus Paludan, dogji një kopje të Kuranit gjatë një proteste më 21 janar para Ambasadës Turke në Stokholm dhe ky akt nxiti valën e reagimit në botën islame, njëherësh u gjykua edhe grisja e kopjes së Kuranit të madhëruar në Holandë dhe kjo nën përkujdesjen e forcave të rendit.
