Partitë opozitare janë mbledhur në seancë të jashtëzakonshme për të diskutuar rreth gjendjes në Korporatën Energjetike të Kosovës.
Në seancë nuk po marrin pjesë deputetë të mazhorancës. Nga opozita thanë se organet kompetente duhet të zhvillojnë hetime në lidhje me skandalet në KEK.
“Jemi mbledhur në këtë seancë me qëllim të diskutimit lidhur me skandalet dhe keqpërdorimet në Korporatën Energjetike të Kosovës. Kjo seancë është e domosdoshme në lidhje me situatën alarmante të shkaktuar nga ndërhyrjet në KEK. Kjo seancë ka për qëllim që Kuvendit t’ia adresoj këto dhe të zhvilloi një debat të hapur për masat që duhet të ndërmerren. Çështjet specifike që kërkohet të trajtohen janë: Skandalet me tenderë njëburimor, blerja e energjisë elektrike dhe ndikimi financiar, ndërhyrja e personave jashtëinstitucional në menaxhimin e KEK-ut, përfshirja e Dejona Mihalit dhe ndërhyrjet e paligjshme në KEK, përfshirë punësimet e jashtëligjshme”, tha shefi i grupit parlamentar të LDK-së, Arben Gashi.
Shefi i Grupit Parlamentar të PDK-së, Abelard Tahiri, ka thënë se për katër vjet të qeverisjes së Albin Kurtit, KEK-u ka shpenzuar mbi 600 milionë euro. Tahiri ka implikuar figura të partisë në pushtet në siç ka thënë në skandalet në KEK.
“Nga 23 prilli i vitit 2020, KEK udhëhiqet nga qeveria Kurti. KEK është kompania më e madhe publike në vend, në vitin 2024 parashihet që buxheti të jetë rreth 250 milionë euro. Nëse e shohim buxhetin e kalon shifrën e 600 milionë euro dhe nuk e dimë se nga kush është menaxhuar, nga Nagipi, nga Dejona apo nga kush…Kemi evidentuar në këtë kuvend se janë dhënë rreth 150 milionë euro përmes kontratave njëburimore. Kjo situatë nuk ka ndodh asnjëherë në KEK. Në drejtimin e VV, ka ndodh shtrenjtimi 100 për qind i energjisë, çmimi i energjisë është rritur ani se ka mjaftueshëm për të mbuluar shpenzimet në Kosovë”, ka theksuar Tahiri.
Ai ka shprehur pakënaqësi edhe për procesin e shpronësimeve në KEK.
Shefi i Grupirt Parlamentar të AAK-së, Besnik Tahiri, ka hedhur akuza në drejtim të koordinatores së Vetëvendosjes, Dejona Mihali, për ndërhyrje në Korporatën Energjetike të Kosovës. Ai ka akuzuar edhe partinë në pushtet për mungesë të pjesëmarrjes në seancë.
“Kemi vendos për shkak se përgjimet që kanë ndodh në publik tregon për ndërhyrje të strukturave që nuk kanë asnjë pozicion në shtetin e Kosovës dhe ndikojnë në institucion siç është korporata më e madhe në vend dhe me qarkullimin më të madh buxhetor…Në Kosovë vendos kur ndalet rryma e kur jo. Ndërhyrjet e personave jofromal rreth punësimeve në KEK. Ndikimi i një individi në politk-bërjen e bordit të KEK-ut. Për çka jeni ju bordi i KEK-ut”, ka deklaruar ai.
Në seancën e jashtëzakonshme për KEK-un po merr pjesë edhe kryetari i Kuvendit të Kosovës, Glauk Konjufca.rtk.
