Presidentja e shtetit, Vjosa Osmani, në fjalimin e saj vjetor para deputetëve të Kuvendit të Republikës ka thënë se sot duhet t’i bashkojë patriotizmi kushtetues i cili sipas të parës së shtetit shkon përtej ndasive politike.
“Andaj, sot, më shumë se kurrë na duhet ajo që njihet si patriotizëm kushtetues, i cili shkon përtej ndasive politike dhe kthehet tek bazamenti i shtetësisë sonë. Është ky lloj patriotizmi që na bashkon, jo sepse ndajmë mendimet e njëjta çdoherë, por sepse besojmë në të ardhmen e ndërtuar mbi vlerat dhe parimet që na përbashkojnë dhe për shkak se populli ynë gjithnjë ka ditur të bashkohet në mbrojtje të atdheut të ndërtuar me aq shumë sakrificë”, than ë fjalimin vjetor Presidentja.
Tutje Osmani tha se në thelb të patriotizmit kushtetues është besimi se kushtetuta është më shumë se një dokument juridik.
“Ajo është një kontratë shoqërore që mishëron idealet dhe aspiratat tona të larta. Ajo garanton lirinë, drejtësinë dhe barazinë para ligjit për të gjithë qytetarët, pavarësisht dallimeve. Këto parime nuk janë vetëm obligime ligjore, por edhe akt patriotizmi që forcojnë themelin e shtetit tone”, vijoi presidentja.
E para e shtetit tha se në këto kohë të trazuara për globin, kur, sipas saj, fragmentimi e përçarja bëhen edhe më të dukshme, besnikëria ndaj parimeve të kushtetutës tha se duhet t’i bashkojë.
“Kjo formë patriotizmi e shndërron obligimin individual në një detyrë qytetare në funksion të mbrojtjes të rendit tonë demokratik, të mbrojtjes së cdo pëllëmbe të Republikës sonë. Sot siguria është parakusht qenësor për mirëqenie të shtuar.”, tha Osmani.
Osmani tha se është i katërti vit që po u drejtohet nga foltorja e Kuvendit në rolin e kreut të shtetit që e quajti si nderin më të madh të jetës.
“Jemi këtu ku jemi, me mision për ta udhëhequr vendin tonë përpara, për ta fuqizuar shtetësinë tonë gjithnjë e më shumë, për të shtuar aleancat e për të qenë vesh e sy, mbështetje për secilin qytetar”.
Sipas Osmanit, momenti kur mund të thonë se ia dolën është kur sipas saj qytetarët do të thonë se janë krenarë për vendin, për vlerat që ai përfaqëson si dhe për mundësitë dhe gjithpërfshirjen që ofron, e jo për shkak të ndonjë personi apo grupi politik. “Ky është nderi më i madh q mund t’i bëjmë Kosovës tonë”, vijoi presidentja.
Ajo tha se rruga deri te shtetësia nuk ishte e lehtë.
“Rruga deri te shteti që e gëzojmë sot nuk ka qenë fare e lehtë. Populli ynë ka humbur edhe më të shtrenjtën, duke përfshirë edhe fëmijët në djep në mënyrë që sot të frymojmë lirshëm. Bashkëdyzimi i vizionit të binomit Ibrahim Rugova e Adem Jashari nëpërmjet luftës çlirimtare në njërën anë dhe ndërtimit të shtetit duke fuqizuar aleancat nga ana tjetër, bëri që themelet e shtetit tonë të jenë të forta, shumë të forta, aq të forta sa që nuk ka forcë e sfidë që do të mund t’i rrënojë ato”, tha presidentja Osmani.rtk.
