Presidentja e vendit Vjosa Osmani, mbrëmë njoftoi se ia ka falur pjesën e mbetur të dënimit, Arza Cakollit, e cila ishte bërë nënë në kohën kur po e vuante dënimin në burg.
Presidenca ka njoftuar se është bërë për arsye humanitare.
E Ministrja e Drejtësisë, Albulena Haxhiu ka publikuar pamje të Arzas dhe foshnjes së saj pas lirimit nga burgu.
“Sapo kemi pranuar Dekretin e Presidentes së Republikës së Kosovës, znj. Vjosa Osmani Sadriu, për faljen e pjesës së mbetur të dënimit të Arza Cakollit, Ministria e Drejtësisë ka ndërmarrë menjëherë të gjitha veprimet e nevojshme për zbatimin e tij. Arza Cakolli sapo është liruar dhe së bashku me fëmijën e saj i janë bashkuar familjes. Siç është njoftuar edhe nga Presidenca, falja është bërë për arsye humanitare, dhe për këtë, falënderojmë Presidencën për bashkëpunimin”, ka shkruar Haxhiu në Facebook, ku ka publikuar edhe foto të Arzës bashkë me foshnjën e saj.