Drejtori i të ashtuquajturës zyrë për Kosovën në qeverinë serbe, Petar Petkoviq tha sot se Kosova, pa i dhënë asnjë shpjegim, ia ka ndaluar hyrjen në vend edhe pse vizita e tij tha se kishte “karakter fetar”. Ai tha se do të merrte pjesë në liturgjinë e mesnatës së Pashkëve në manastirin e Graçanicës.
“Ka një vit, edhe pse jam negociatori kryesor me Prishtinën, nuk më lejojnë ta vizitoj territorin e Kosovës dhe në këtë mënyrë i shkelin të gjitha marrëveshjet”, tha Petkoviq në TV Pink, duke theksuar se vizitën e kishte paralajmëruar “me kohë”.
Ai tha se deklaratat e kryeministrit të Kosovës Albin Kurti tregojnë se Kosova “nuk ka ndërmend ta formojë kurrë një asociacion të komunave serbe”.
Ai tha se Kosova “nuk do të jetë kurrë shtet”, ndërsa pkrsërit se Beogradi do të vazhdojë të ndihmoj qytetarët serb në Kosovë.
Ai theksoi se Beogradi vazhdon qëndrimin konstruktiv ndaj dialogut me Prishtinën dhe’ lufton’ për të parandaluar anëtarësimin e Kosovës në Këshillin e Evropës.
