Presidenti i Kroacisë, Zoran Milanoviq, ka realizuar një vizitë zyrtare në Vatikan, ku u prit në një audiencë private nga Papa Leoni XIV. Gjatë takimit, Milanoviq e ftoi Atin e Shenjtë të vizitojë Kroacinë, duke shprehur pritshmëritë që kjo vizitë të zhvillohet në të ardhmen e afërt.
I pyetur nëse është diskutuar Kosova, Milanoviq përsëriti se Vatikani nuk e ka njohur Kosovën, duke thënë se Selia e Shenjtë “është shumë konservatore për çështje të tilla”, ashtu si pesë shtete anëtare të BE-së që nuk e kanë njohur atë, “secili për arsyet e veta”.
“Kjo tregon se shtetet veprojnë sipas interesave të tyre, gjë që nuk është domosdoshmërisht e keqe, përderisa ato nuk janë dashakeqe ose ndërhyrëse,” tha Milanoviq, duke shtuar se ai e mbështet njohjen e Kosovës kudo që mundet. “Unë nuk e bëj këtë për t’i kundërvënë Serbisë ose serbëve, është thjesht çështje realiteti”, tha ai, raporton HINA./rtk
