Komiteti i posaçëm i Parlamentit Evropian për pandeminë Covid-19 ka vendosur të thërrasë Presidenten e Komisionit Evropian, Ursula von der Leyen, në një seancë dëgjimore për kontratat e vaksinës Covid19.
Në veçanti, komisioni në fjalë i Parlamentit Evropian fton Ursula von der Leyen të japë shpjegime në lidhje me rolin e saj në negocimin e kontratës së tretë dhe më të madhe me Pfizer, por edhe për mesazhet (SMS) që ajo ka shkëmbyer me CEO-n e kompanisë Albert Bourla.
Gjithashtu, pas refuzimit të dyfishtë të CEO-s së Pfizer z. Bourla për të dëshmuar në Parlamentin Evropian, komiteti i posaçëm për Covid-19 po bën thirrje për sanksione ndaj kompanisë farmaceutike duke i pezulluar aksesin e saj në Parlamentin Evropian.
I njëjti komitet kërkon që CEO-s së Pfizer, Albert Bourla, ti pezullohet qasja në Parlamentin Evropian.
Kjo kërkesë do të shqyrtohet nga Konferenca e Presidentëve të Parlamentit Evropian (bazuar në nenin 123 të Rregullores së Procedurës së PE), e cila do të përcaktojë detajet e një kufizimi të mundshëm të aksesit të Pfizer në PE.(p.sh. për sa i përket hapësirës kohore dhe personave).
Sekretariati i Përgjithshëm, me autorizimin e Dekanëve, mund t’i mohojë të drejtën e aksesit në PE një personi të regjistruar i cili, ndër të tjera, “refuzoi të përmbushë një ftesë zyrtare për të marrë pjesë në një seancë dëgjimore ose mbledhje komiteti ose që nuk bashkëpunon me një komision hetimor pa dhënë arsyetim të mjaftueshëm”.
Sa i përket kërkesës së Komitetit Covid për të ftuar Presidenten e Komisionit në një seancë dëgjimore, sipas rregullores së PE ftesa do t’i dërgohet Presidentes së Parlamentit Roberta Metsola, e cila më pas do të vendosë nëse do t’i kërkojë Ursula von der Leyen të marrë pjesë në seancë.
