Ministri i Punëve të Jashtme të Serbisë, Ivica Daçiç, ka pretenduar se Bashkimi Evropian ka shpërblyer Kosova me liberalizimin e vizave, kjo pasi ambasadorët e shteteve anëtare të Bashkimit Evropian, këtë të mërkurë, kanë rënë dakord për mandatin negociues të Këshillit për rregullacionin për udhëtimin pa viza për qytetarët që mbajnë pasaporta të Kosovës.
Sipas pretendimeve të kryediplomatit serb vendimi i Këshillit, apo më saktësisht Ambasadorëve të Shteteve Anëtare të Bashkimit Evropian për vizat, do të jetë në një të ardhme të afërt kundërporduktive.
“Nuk është mirë as për BE-në, sepse tregon se nuk ka autoritet, tregon se ka standarde të dyfishta, nuk e di se çfarë mesazhi do të ishte për Serbinë, e cila ka qenë e saktë gjatë gjithë këtyre viteve, e cila ka qenë një partner i parashikueshëm dhe që vazhdimisht përballet me kërcënime, presione dhe kushte, për dallim nga Kosova, e cila praktikisht shpërblehet për pandershmërinë dhe mospërmbushjen e obligimeve ndërkombëtare”, ka thënë Daçiç në një deklaratë për agjencinë e lajmeve Tanjug.
Daçiç më tej ka supozuar se Kosova nuk ka qenë asnjëherë kundër që qytetarët e rajonit të udhëtojnë lirshëm pa viza për në vendet anëtare të Unionit.
“Diçka tjetër është në lojë. Para disa ditësh ishim dëshmitarë se Kosova është problemi kryesor në zbatimin e Marrëveshjes së Brukselit, dhe paraqet kërcënim për paqen dhe stabilitetin rajonal”.
Ambasadorët e Shteteve Anëtare të Bashkimit Evropian këtë të mërkurë kanë rënë dakord për mandatin negociues të Këshillit për rregullacionin për udhëtimin pa viza për qytetarët që mbajnë pasaporta të Kosovës.
Në bazë të këtij mandati, presidenca e Këshillit do të fillojë negociatat me Parlamentin Evropian.