Rusia dhe Kina kanë zhvilluar bisedime “thelbësore” për të forcuar lidhjet në fushën e mbrojtjes dhe ushtarake, sipas ministrit të Mbrojtjes ruse, Andrei Belousov.
Këto bisedime vijnë në një kohë kur të dyja vendet po çimentojnë një partneritet “pa kufij” dhe po kritikojnë përpjekjet e Shteteve të Bashkuara për të zgjeruar ndikimin në Azi.
Belousov u takua me nënkryetarin e komisionit qendror ushtarak të Kinës, Zhang Youxia, dhe të dy palët shprehën angazhimin e tyre për të thelluar dhe zgjeruar marrëdhëniet ushtarake, duke vazhduar shkëmbimet e nivelit të lartë.
Kina ka theksuar gatishmërinë për të kryer veprime të tjera ndaj Tajvanit, pas manovrave ushtarake pranë ishullit, të cilat u interpretuan si një paralajmërim ndaj “akteve separatiste”.
Këto stërvitje janë dënuar nga Tajvani dhe Shtetet e Bashkuara.
Rusia dhe Kina shpallën “partneritet pa kufij” në shkurt të vitit 2022, pak para se Rusia të fillonte sulmin në Ukrainë.
Udhëheqësit Putin dhe Xi Jinping u angazhuan për një “epokë të re” të partneritetit, duke theksuar nevojën për të forcuar bashkëpunimin strategjik.
Moska ka shprehur mbështetje për Pekin në çështjet aziatike dhe ka kritikuar përpjekjet e Shteteve të Bashkuara për të ndezur tensionet rreth Tajvanit, shkruan euronews.al.Shtetet e Bashkuara akuzojnë Kinën për mbështetje të Rusisë në luftën në Ukrainë, por Kina mohon të ofrojë armë për ndonjërën palë, duke insistuar se tregtia me Rusinë duhet të vazhdojë normalisht.
