Në zgjedhjet parlamentare të 9 shkurtit, disa kryetarë komunash ishin gjithashtu pjesë e garës për të marrë mbështetje nga qytetarët, duke kërkuar mundësinë për të siguruar një vend në Kuvendin e Kosovës.
Në përgjithësi, kryetarët e disa komunave të udhëhequra nga Lidhja Demokratike e Kosovës dhe Aleanca për Ardhmërinë e Kosovës ishin ata që morën pjesë në garë.
Kryetari i Lipjanit, Imri Ahmeti, ishte në mesin e kandidatëve të LDK-së, i cili kërkoi mbështetjen e qytetarëve në zgjedhjet e 9 shkurt.
Sipas rezultateve të deritanishme të Komisionit Qendror të Zgjedhjeve, e të cilat nuk janë përfundimtare, Ahmeti ka marrë 16 mijë e 190 vota.
Në garë ishte edhe kryetari i Komunës së Pejës, Gazmend Muhaxheri, ku deri tani ka grumbulluar 11 mijë e 255 vota.
Gjithashtu, kryetari i Vitisë, Sokol Haliti, kërkoi mbështetje nga qytetarët që të jetë në legjislaturën e ardhshme të Kuvendit, ai deri tani ka grumbulluar 11 mijë e 159 vota.
Edhe kryetari i Obiliqit, Xhafer Gashi, ishte pjesë e listës së LDK-së.
Të dhënat e fundit të KQZ-së, tregojnë se ai ka marrë mbështetjen nga 9 mijë e 307 qytetarë.
Disa kryetarë komunash të udhëhequra nga Aleanca për Ardhmërinë e Kosovës kërkuan gjithashtu një ulëse në Kuvend.
Ardian Gjini, i cili aktualisht është kryetar i Gjakovës kërkoi mbështetje nga qytetarët, e siç duket deri më tani, atë e kanë votuar 8 mijë e 227 qytetarë.
Në listën e AAK-së, ishte edhe kryetari i Deçanit, Bashkim Ramosaj.
Sipas listave të deritanishme, Ramosaj ka marrë mbështetjen nga 7 mijë e 453 qytetarë.
Bali Muharremaj, kryetari i Suharekës, po ashtu ishte në mesin e kandidatëve për deputetë, ai ka grumbulluar 5 mijë e 720 vota.
Vota kërkoi edhe kryetari i Rahovecit, Smajl Latifi.
Latifi sipas të dhënave që janë publikuar deri tani ka marrë mbështetjen nga 5407 qytetarë.
Ndryshe, zgjedhjet parlamentare janë mbajtur ditën e diel, më 9 shkurt. Ku sipas rezultateve preliminare, Lëvizja Vetëvendosje ka marrë 40.80%, Partia Demokratike e Kosovës 22.03%, Lidhja Demokratike e Kosovës 17.63%., transmeton Telegrafi.Aleanca për Ardhmërinë e Kosovës dhe Nisma Socialdemokrate 7.46%.
Rezultatet preliminare nuk përfshijnë votat me kusht, votat e personave me nevoja të veçanta dhe votat jashtë Kosovës.
