Sekretari i Shtetit i SHBA-së, Marco Rubio ka deklaruar se presidenti Donald Trump dëshiron që lufta Rusi-Ukrainë të përfundojë dhe ka shprehur shpresë për përparim me të dy vendet në ditët në vijim,.
Duke theksuar rëndësinë e bisedimeve të paqes sot në Stamboll, Rubio u tha gazetarëve në ditën e dytë të një takimi të NATO-s në Turqi se aleanca do të vazhdojë përpjekjet për të siguruar që nuk ka “lidhje të dobëta” brenda grupit, si dhe shtoi se konflikti Rusi-Ukrainë mbetet çështja kryesore.
“Presidenti i SHBA-së ka qenë shumë i qartë se dëshiron që lufta të përfundojë”, tha Rubio duke shtuar se Trump është i gatshëm të mbështesë çdo mekanizëm që do të sillte paqe të qëndrueshme.
Duke theksuar qëllimin e NATO-s për parandalimin e luftërave, Rubio tha se “Trump dëshiron t’u japë fund luftërave dhe kjo është shpresa për Rusinë dhe Ukrainën”.
“Do të shohim se çfarë do të ndodhë gjatë dy ditëve të ardhshme në këtë drejtim, por duam të shohim përparim të bërë”, tha ai.
Rubio theksoi se “nuk ka zgjidhje ushtarake për konfliktin Rusi-Ukrainë”, raporton Anadolu.”Kjo luftë do të përfundojë jo përmes një zgjidhjeje ushtarake, por përmes një zgjidhjeje diplomatike”, u shpreh sekretari amerikan.
