Deputeti i Kuvendit të Kosovës, Driton Hyseni konfirmoi se çështja e avancimit të statusit të Kosovës do të jetë në rend dite të hënën, më 27 maj në sesionin pranveror të Asamblesë Parlamentare të NATO-s, punimet e së cilit sesion kanë nisur sot dhe do të vazhdojnë deri të hënën.
Hyseni në një prononcim për Telegrafin tha se delegacioni i Kosovës ka arritur të premten në mbrëmje në Sofje të Bullgarisë dhe do të merr pjesë në punimet tre ditore të sesionit pranveror të Asamblesë.
“Si rrjedhojë e vendimit të Komitetit të përhershëm drejtues të Asamblesë Parlamentare të NATO-s, i votuar më 24 mars të këtij viti, në favor të ngritjes së statusit të delegacionit të Kosovës, ju konfirmoj se çështja e tillë është në agjendën e punimeve të Asamblesë dhe për të pritet votimi me shumicën e deputetëve në Asamblenë Parlamentare të NATO-s më 27 maj”, tha ai.
Deputeti nga radhët e LVV-së tha se presin epilog pozitiv dhe zyrtarizim të plotë të statusit të ri të delegacionit nga Kosova, si anëtar i asociuar i Asamblesë Parlamentare të NATO-s.
Ndryshe, në muajin mars edhe kryetarja e Komisionit Parlamentar për Politikë të Jashtme të Shqipërisë, Mimi Kodhelli në një postim në Facebook kishte treguar lidhur me procesin e votimit në Komisionin e Përhershëm të Asamblesë Parlamentare të NATO-s.
Kodheli kishte njoftuar se pas një diskutimi të gjatë në Byronë e Asamblesë Parlamentare të NATO-s dhe veçanërisht me mbështetjen e kolegëve amerikanë dhe britanikë kanë arritur të votojnë në Komisionin e Përhershëm një kërkesë të hershme të Kuvendit të Kosovës, avancimin e statusit.
