Një zyrtar i lartë i Departamentit të Shtetit në Shtetet e Bashkuara tha të martën para gazetarëve se ShBA-ja është e shqetësuar se arritja e trupave ruse në Bjellorusi për ushtrime ushtarake mund të bëhet prani e përhershme, që mund të çojë në dërgimin e armëve bërthamore në këtë shtet.
Trupat ruse po vendosen në Bjellorusi, pasi presidenti i këtij vendi, Aleksander Lukashenko, njoftoi të hënën se dy shtetet aleate do të zhvillojnë ushtrime të përbashkëta ushtarake muajin e ardhshëm.
Vendimi që erdhi pa njoftim paraprak për vendet fqinje, ishte shqetësim shtesë në kohën e tensioneve me Perëndimin për pushtimin e mundshëm të Ukrainës nga Rusia. Ukraina kufizohet me Bjellorusinë në pjesën veriore.
Zyrtari amerikan, duke folur në kushte anonimiteti, tha se madhësia e forcave ruse që po arrijnë në Bjellorusi është “përtej asaj që do të prisnim nga një ushtrim norma”, shkruan France24.
Ai shtoi se ndryshimet në kushtetutën bjelloruse përmes referendumit të muajit të ardhshëm mund ta lejojnë praninë e përhershme të ushtrisë ruse në Bjellorusi, përcjell Gazeta Express. “Këto ndryshime kushtetuese mund t’i tregojnë planet e Bjellorusisë për të lejuar që forcat konvencionale dhe bërthamore ruse të stacionohen në territorin e saj”, tha zyrtari amerikan.