Shtetet e Bashkuara paralajmëruan Iranin nga mbledhja e Këshillit të Sigurimit në Organizatën e Kombeve të Bashkuara që të mos e mendojë të sulmojë apo kërcënojë Amerikën dhe Izraelin.
“Veprimet tona janë mbrojtëse. Më lejoni të jem e qartë: regjimi iranian do të mbahet përgjegjës për veprimet e tij. Paralajmërojmë seriozisht Iranin, dhe grupet e afërta me të që të mos ndërmarrin veprime kundër Shteteve të Bashkuara, apo kundër Izraelit”, deklaroi Ambasadorja amerikane në OKB, Linda Thomas-Greenfield.
Diplomatja shtoi se Këshilli i Sigurimit duhet të dënojë sulmin e Iranit dhe të vendosë “sanksione serioze” ndaj Rojës Revolucionare të Iranit për veprimet e saj.
Sekretari i Përgjithshëm i OKB-së Antonio Guterres kërkoi ndërprerjen e menjëhershme të përshkallëzimit dhe shkëmbimit të sulmeve, që sipas tij po i çojnë popujt e Lindjes së Mesme drejt humnerës.
“Është e një rëndësie thelbësore që të shmangim një luftë të plotë në Liban, që do të kishte pasoja tepër të rënda,” tha ai.
Guterres dënoi sulmin e Iranit ndaj Izraelit, si dhe sulmet e Hamasit dhe Hezbollahut, ndërkohë që kritikoi Izraelin, për atë që e quajti, fushatën më të përgjakshme dhe më shkatërrimtare ushtarake gjatë mandatit të tij si sekretar i përgjithshëm duke iu referuar konfliktit në Gazë pas sulmit të 7 tetorit të Hamasit ndaj Izraelit.
Në një letër dërguar Këshillit të Sigurimit të martën, Irani justifikoi sulmin ndaj Izraelit si akt të vetëmbrojtjes sipas nenit 51 të Kartës së OKB-së, duke cituar “veprimet agresive” të Izraelit, përfshirë shkeljen e sovranitetit të Iranit. VOA (A2 Televizion)
